الماتىدا كەيبىر قوعامدىق كولىك جۇرگىزۋشىلەرىنىڭ ءتيىستى ساناتتارى جوق

مۇنداي دەرەكتەردى الماتى پوليسەيلەرى جاساپ وتىر

الماتىدا “ءقاۋىپسىز جول” جەدەل الدىن الۋ ءىس-شاراسى اياسىندا ءتارتىپ ساقشىلارى رەيدتىك ءىس-شارالار وتكىزۋدە، دەپ حابارلايدى Almaty-akshamy.kz Polisia.kz-كە سىلتەمە جاساپ.

بۇعان دەيىن حابارلانعانداي، دامىتۋ، باقىلاۋ جانە جەدەل الدىن الۋ ءىس-شارالار اياسىندا جول قوزعالىسىن قاداعالاۋ كۇشەيتىلدى.

«جەدەل الدىن الۋ ءىس-شارالار وتكىزىلگەن كۇندەرى جەكە قۇرام قىزمەتتىڭ كۇشەيتىلگەن نۇسقاسىنا اۋىستىرىلدى، ناريادتاردىڭ تىعىزدىعى ارتتى. شارانىڭ باستى ماقساتى – جول قوزعالىسىنا قاتىسۋشىلاردىڭ جولداعى ءتارتىبى مەن قاۋىپسىزدىگىن قامتاماسىز ەتۋ، جول قوزعالىسى ەرەجەلەرىن بۇزۋ فاكتىلەرىنىڭ جولىن كەسۋ، جول قوزعالىسى ەرەجەلەرىنىڭ تالاپتارىن ورىندامايتىن جۇرگىزۋشىلەردى انىقتاۋ»، – دەدى الماتى قالالىق پد اكىمشىلىك پوليسيا باسقارماسىنىڭ باستىعى نۇرلان امانبەك.

پوليسەيدىڭ ايتۋىنشا، اۆتوبۋس جانە تاكسي پاركتەرىنىڭ قىزمەتى ەرەكشە باقىلاۋدا.

«جاقىندا عانا الماتىنىڭ بوستاندىق اۋدانىندا رەيدتىڭ ءبىر ساعاتقا جەتپەس ۋاقىتىندا ءتيىستى ساناتتارى جوق، تيىسىنشە، قوعامدىق كولىكتى باسقارۋ قۇقىعى جوق ءۇش اۆتوبۋس جۇرگىزۋشىسى انىقتالدى. جۇرگىزۋشىلەر اقبك-نىڭ 612-بابى 2-بولىگى بويىنشا جاۋاپقا تارتىلدى. ولاردىڭ قوعامدىق كولىكتەرى ايىپپۇل تۇراعىنا قويىلدى. رۇقسات ەتىلمەگەن ادامداردىڭ جولاۋشى تاسىمالداۋىنا جول بەرگەن اۆتوكاسىپورىن باسشىلارىنا قاتىستى دا اكىمشىلىك شارالار قولدانىلدى. ءبىز وسى ءجاى اياسىندا قالالىق اۆتوكاسىپورىندار وكىلدەرىمەن كەزدەسۋلەر وتكىزەتىنىمىزدى جانە وندا جول قاۋىپسىزدىگىن قامتاماسىز ەتۋ بويىنشا ءبىرقاتار ماسەلەلەر تالقىلاناتىنىن ايتا كەتەيىن»، – دەدى ن. امانبەك.