«مەن كاسىپكەر» ۇلتتىق جوباسى
وڭىرلىك كاسىپكەرلەر پالاتاسىنا قاراستى الماتى ايەلدەر كاسىپكەرلىگىن دامىتۋ ورتالىعى جۇمىسشى ماماندىقتارى بويىنشا تەگىن كۋرستار وتكىزەدى، دەپ حابارلايدى Almaty-akshamy.kz.
«ءبىز كاسىپكەرلەرىمىزدىڭ قالاۋىن ەسكەرە وتىرىپ، تەگىن وقىتۋ كۋرستارىن انىقتايمىز. بيىلعى جىلى ايەلدەر كاسىپكەرلىگىن دامىتۋ ورتالىعىنىڭ كليەنتتەرى اراسىندا جۇرگىزىلگەن ساۋالناماعا سايكەس، تىگىن جانە كونديتەرلىك كۋرستارعا وتىنىشتەر كوبىرەك تۇسكەن. جاقىندا وسى باعىتتار بويىنشا كۋرستار ۇيىمداستىرامىز. الداعى جىلدىڭ ءۇشىنشى جانە ءتورتىنشى توقسانىندا تاعى بىرنەشە وقۋ كۋرستارى جوسپارلانعان»، – دەپ ءتۇسىندىردى ورتالىقتىڭ مەنەدجەرى اسەل جاراسوۆا.
مامان وتكەن جىلى «ءپىشۋ جانە تىگىنشى»، «كونديتەر-دەكوراتور» جانە «گۇل ءوسىرۋشى» كۋرستارىندا ءوز ءىسىن اشىپ، دامىتۋ ماقساتىندا 60-تان استام قىز-كەلىنشەك جۇمىسشى ماماندىقتارى بويىنشا ءبىلىم العانىن ەسكە سالدى. ولاردىڭ بارلىعى وقۋدى ءساتتى اياقتاپ، سەرتيفيكاتتارعا يە بولدى.
«كۋرس وتە جاقسى ءوتتى. كاسىپكەرگە دە، فلوريستكە دە كوپتەگەن تانىمدىق دۇنيەلەر بىلدىك. كاسىپكەردىڭ ءوزى، جاتتىقتىرۋشىنىڭ قىرلارى نەدە، قانداي قاتەلىكتەر بار ەكەنىن جەتە ءتۇسىندىرىپ بەردى. نەگىزگى كۋرس بويىنشا ءبىز كوپتەگەن پايدالى اقپارات پەن داعدىلار الدىق. جاتتىقتىرۋشىعا جانە ايەلدەر كاسىپكەرلىگىن دامىتۋ ورتالىعىنا ەرەكشە العىس ايتامىز. ورتالىق ايەلدەرگە قامقورلىق جاسايدى، بۇل تەك قامقورلىق ەمەس، بۇل ايەلدىڭ ءبىلىم الۋىنا، تۇلعا بولىپ وسۋىنە مۇمكىندىك»، – دەدى فلوريستيكا كۋرسىنىڭ قاتىسۋشىسى كاميلا وتەپبەرگەنوۆا.
الماتى قالاسى كاسىپكەرلەر پالاتاسىنىڭ ءتوراعاسى اۋەز تايمبەتوۆ «اتامەكەن» ۇكپ 2023 جىلدىڭ باسىنان باستاپ كاسىپكەرلىكتى دامىتۋدىڭ 2021-2025 جىلدارعا ارنالعان «مەن كاسىپكەر» ۇلتتىق جوباسى اياسىندا كاسىپكەرلىكتى دامىتۋ قۇرالى بويىنشا قىزمەت كورسەتىپ كەلە جاتقانىن اتاپ ءوتتى.
ءبىرىنشى باعىت – ايەلدەر كاسىپكەرلىگىن دامىتۋ ورتالىعى كاسىپكەر ايەلدەرگە نەمەسە 18 جاسقا تولعان كاسىپكەرلىك باستاماسى بار ايەلدەرگە ءتۇرلى قىزمەت تۇرلەرىن كورسەتەدى. اتاپ ايتقاندا، كونسۋلتاسيالار، كاسىپتىك جانە ىسكەرلىك وقىتۋدى ۇيىمداستىرۋ، سونداي-اق قولونەردىڭ ءداستۇرلى تۇرلەرىنە وقىتۋ، تالىمگەرلىك، قارجىلاندىرۋدى تارتۋ بويىنشا وقىتۋ، ايەلدەر كاسىپكەرلىگى وكىلدەرىنىڭ حالىقارالىق جوبالارعا قاتىسۋىنا جاردەمدەسۋ قىزمەتتەرى (كاسىپكەر ايەلدەردى اقپاراتتاندىرۋ)، «ءبىر اۋىل – ءبىر ءونىم.
سونداي-اق وڭتۇستىك استانادا «باقىتتى وتباسى» ورتالىقتارىندا كوپ بالالى ايەلدەرگە كاسىپكەرلىك الەۋەتىن ىسكە اسىرۋعا كومەكتەسۋگە باعىتتالعان «ىسكەر انا» باعدارلاماسى جۇزەگە اسىرىلۋدا. سونداي-اق باعدارلاماعا قاتىسۋشىلار قۇقىقتىق جانە كونسۋلتاتيۆتىك كومەك الادى. باعدارلاما اياسىندا 2613-تەن استام ادام تۇلعالىق ءوسۋ، كوشباسشىلىق، بيزنەس جانە پسيحولوگيا بويىنشا بازالىق ترەنينگتەردى، 2810-ى كوپبالالى وتباسىلاردى وقىتۋ كۋرستارىنان ءوتتى.
ايەلدەر كاسىپكەرلىگى شوب سەكتورىنداعى جۇمىس ورىندارىنىڭ 31%-ىن جانە قازاقستاننىڭ ءجىو-نىڭ 14،6%-ىن قامتاماسىز ەتەدى.