الماتىدا قىركۇيەك-مامىر ارالىعىندا كارتوپ پەن ءسابىز قىمباتتامايدى. بۇل ءۇشىن 22 مىڭ توننا كوكونىسكە شارت جاسالعان.
الماتى قالاسىندا الەۋمەتتىك ماڭىزى بار ازىق-تۇلىك باعاسىن تۇراقتاندىرۋ ءۇشىن جەرگىلىكتى بيۋدجەتتەن 10 ملرد تەڭگە اقشا ءبولىندى. بۇل تۋرالى الماتى قالاسى كاسىپكەرلىك جانە ينۆەستيسيا باسقارما باسشىسىنىڭ ورىنباسارى دامير تازابەك مالىمدەدى، دەپ حابارلايدى Almaty-akshamy.kz Informburo.kz-كە سىلتەمە جاساپ.
ۆەدومستۆو وكىلىنىڭ ايتۋىنشا، حالىق سانىنىڭ وسۋىنە بايلانىستى ءونىم جەتىسپەۋشىلىگى بولدى. سونداي-اق، بۇعان پوستپاندەميا كەزىندە لوگيستيكانىڭ ناشارلاۋى، كەي ەلدىڭ شەكاراسىن جابۋى جانە تابيعي اپاتتار سەبەپ.
«ازىق-تۇلىك باعاسىنىڭ قىمباتتاۋى ءقازىر بارلىق مەملەكەتتە بايقالىپ وتىر دەسەك بولادى. بۇل ماسەلە بويىنشا، الماتى قالاسىندا باعانى تۇراقتاندىرۋ قورى جۇمىس جاساپ جاتىر. وعان 10 ملرد تەڭگە كولەمىندە اقشا بولىنگەن. اتالعان قور بارلىق الەۋمەتتىك ماڭىزدى ازىق-تۇلىكپەن قامتاماسىز ەتەدى. سونداي-اق، قالا تۇرعىندارى ءۇشىن ولاردى تومەن باعادا ساتىپ الۋ مۇمكىندىگى جاسالعان»، – دەدى دامير اقانعالي ۇلى.
ءارى قاراي مامان ءسابىز بەن كارتوپ باعاسىنىڭ قىمباتتاۋى ماسەلەسىنە توقتالدى. ايتۋىنشا، كۇزدەن باستاپ بۇل كوكونىستەردىڭ باعاسى ءۇشىن الاڭداۋعا نەگىز جوق.
«باعدارلاما اياسىندا 22 مىڭ توننا كوكونىستى فورۆاردتىق كەلىسىمشارتپەن ساتىپ الدىق. بۇل ونىمدەر 1 قىركۇيەكتەن 1 مامىرعا دەيىن تومەندەتىلگەن باعامەن ساتىلادى. Magnum جەلىسىندە جىل سوڭىنا دەيىن 8 مىڭ توننا، Toimart دۇكەندەرىندە 1 500 توننا ءونىم قاراستىرىلعان. بۇعان قوسا نەگىزگى وندىرۋشىلەردە دە قوسىمشا ءونىم ساقتالىپ تۇر. الماتى قالاسىنىڭ تۇرعىندارى ءۇشىن جەتكىلىكتى. باسقارمامىز نەگىزىنەن الەۋمەتتىك ماڭىزى بار ازىق-تۇلىك ونىمدەرىن تۇراقتاندىرۋ ساياساتىن جۇرگىزەدى. جەڭىلدىكپەن نەسيە بەرۋ، تىكەلەي الىپ كەلگەن ونىمدەردى تىكەلەي جارمەڭكە ارقىلى ساتۋ سىندى شارالاردى دا ۇيىمداستىرىپ وتىرامىز»، – دەدى دامير تازابەك.