الماتىدا كاراتەدەن الەم چەمپيوناتى ءوتتى

الەم ۇزدىكتەرى الماتىدا باس قوستى. بۇندا كيوكۋشين شەبەرلەرىنىڭ دۇنيەجۇىزىلىك دوداسى ءوتتى.

وعان 35 مەملەكەتتەن 700-گە جۋىق قاتىسۋشى جينالدى، دەپ حابارلايدى اlmaty-akshamy.kz 24.kz-كە سىلتەمە جاساپ.  ايتا كەتۋ كەرەك، الەمدىك المان ۇزاق ۇزىلىستەن كەيىن قايتا جاندانىپ وتىر. ياعني، پاندەمياعا بايلانىستى توقتاپ قالعان ەدى. سوندىقتان، الماتىداعى بايراقتى باسەكە ءا دەگەننەن تارتىستى باستالدى. جارىستىڭ العاشقى كۇندەرى جاسوسپىرىمدەر، جاستار جانە ارداگەرلەر اراسىنداعى جەكپ-ەجەكتەر بولدى. ناتيجەسىندە قازاقستان قۇراماسى جالپىكوماندالىق ەسەپتە العا شىقتى. ءتىپتى، وسى سپورتتىڭ وتانى سانالاتىن جاپون قىز-جىگىتتەرىنەن دە اسىپ ءتۇستى. كەيىن جەڭىس جولىن ەرەسەكتەر جالعاستىردى. ياعني، 13 سالماقتاعى چەمپيوندار انىقتالعان ەدى. جارىس قورىتىندىسى بويىنشا ۇلتتىق قۇراما وكىلدەرى 6 التىن، 4 كۇمىس جانە 11 قولا جەڭىپ الدى. ايەلدەر اراسىندا نارقىز ۇزاقبايەۆا مەن ۇلجان راقىشيەۆا ءوز سالماقتارىندا توپ جارسا، ەرلەر اراسىندا حاتيپ ايۋپوۆ، نۇرلىحان ءسادۋاقاسوۆ، رىسبەك ماقسۇتوۆ جانە نيكيتا گاراس قارسىلاس شاق كەلتىرمەدى. جالپى تىزىمدە قازاقستان ءبىرىنشى، ال، رەسەي مەن جاپونيا، سايكەسىنشە، ەكىنشى جانە ءۇشىنشى ورىنداردا تۇر.