الماتىدا جىلىتۋ ماۋسىمى ەرتە باستالادى: قوسىلۋ كەستەسى جاريالاندى

الماتىدا اۋا رايىنىڭ كۇرت سۋىتۋىنا بايلانىستى جىلىتۋ ماۋسىمى ادەتتەگىدەن ەرتەرەك باستالادى، دەپ حابارلايدى اqshamnews.kz ءتىلشىسى.

"قالا اكىمى دارحان ساتىبالدىنىڭ تاپسىرماسىمەن 8 قازاننان ورتالىق جىلۋعا قوسۋ جۇمىستارى جۇرگىزىلەدى"، – دەپ مالىمدەدى الماتى قالاسىنىڭ ەنەرگەتيكا جانە سۋمەن جابدىقتاۋ باسقارماسى.

الدىمەن قاي نىساندار قوسىلادى؟

باسقارما دەرەگىنشە، ەڭ اۋەلى جىلۋ بالاباقشالارعا، مەكتەپتەرگە جانە مەديسينالىق ۇيىمدارعا بەرىلەدى. كوپقاباتتى تۇرعىن ۇيلەردى قوسۋ 10 قازاننان باستالادى. ۇيلەرگە جىلۋ بەرىلگەن سوڭ كسك جانە وسي ماماندارى ىشكى جۇيەلەردى رەتتەپ، رادياتورلار مەن قۇرىلعىلاردان اۋانى جىبەرەدى، قىسىمدى تەڭشەپ، پاتەرلەردىڭ بىركەلكى جىلىنۋىن قامتاماسىز ەتەدى.

“الجج” دايىندىعى

قالانىڭ جىلۋ كەشەنى – “الجج” كومپانياسىندا سيركۋلياسيالىق رەجيم ىسكە قوسىلعان، بۇل قاجەت بولعان جاعدايدا بارلىق اۋدانعا جەدەل جىلۋ بەرۋگە مۇمكىندىك بەرەدى. كاسىپورىن قىس ماۋسىمىنا تولىق دايىن ەكەنىن حابارلادى: ىقتيمال اقاۋلارعا جەدەل ارەكەت ەتۋ ءۇشىن ماتەريالدار مەن جابدىقتاردىڭ اۆاريالىق قورى جاساقتالعان. 2025–2026 جىلعى جىلىتۋ ماۋسىمىندا تاۋلىك بويى كەزەكشىلىكتە 16 اۆاريالىق جانە جوندەۋ بريگاداسى (بارلىعى 220 مامان، 56 تەحنيكا) جۇمىس ىستەيدى.

نورماتيۆ تۋرالى ەسكە سالۋ

بۇعان دەيىن باسقارما جىلىتۋ ماۋسىمىن باستاۋ تۋرالى شەشىم سىرتقى اۋانىڭ تاۋلىكتىك ورتاشا تەمپەراتۋراسى +8°C جانە ودان تومەن دەڭگەيدە قاتارىنان بەس تاۋلىك ساقتالعاندا قابىلداناتىنىن حابارلاعان بولاتىن. كۇرت سۋىتۋعا بايلانىستى بيىل قوسۋ مەرزىمى ىلگەرى جىلجىتىلدى.