تاريف كوتەرىلۋى مۇمكىن
الماتىنى جىلۋ جانە ەلەكترمەن قامتىپ وتىرعان ورتالىقتاردىڭ قۇرال-جابدىعى 78%-كە توزعان. بۇل تۋرالى «الەس» كومپانياسىنىڭ وكىلدەرى مالىمدەدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
كەيبىر ورتالىقتىڭ سالىنعانىنا 60 جىلدان اسقان. وسى كۇنگە دەيىن بار بولعانى 20 قۇرىلعى جاڭارتىلىپتى. جارتى عاسىردان اسا جۇمىس ىستەپ تۇرعان قازاندىقتاردى جاڭالاپ، ەلەكتر جەلىلەرىن اۋىستىرۋ قوماقتى قاراجاتتى تالاپ ەتەدى. مامانداردىڭ ايتۋىنشا، الماتى ءوڭىرىن جارىقپەن قامتاماسىز ەتەتىن ەلەكتر جەلىلەرى دە جوندەۋ كورمەگەن.
«تاريف كوتەرىلۋى مۇمكىن، تاريف كوتەرىلمەيدى دەپ ايتا المايمىز قازىرگى تاڭدا. ويتكەنى، وزدەرىڭىز كورىپ تۇرسىزدار، 60-جىلدارى شىققان ەلەكتر قوندىرعىلارى ءوزىنىڭ ەكسپلۋاتاسيالىق رەسۋرستارى ءبىتىپ جاتىر. وعان قوسىمشا بولشەكتەر شىقپايدى»، - دەيدى «الاتاۋ جارىق كومپانياسى» اق باس ينجەنەرى جاقسىلىق ساعىنبەكوۆ.