الماتىدا باعدارشامداردى ءاداپتيۆتى باسقارۋ جۇيەسىن ەنگىزۋ اياقتالادى
الماتىدا بيىل جول قوزعالىسىن باسقارۋدىڭ اۆتوماتتاندىرىلعان جۇيەسى (جقبج) جوباسىن ىسكە اسىرۋ جالعاسادى. كوشەلەردىڭ وتكىزۋ قابىلەتىن ارتتىرۋ ماقساتىندا جۇيەگە قالانىڭ بارلىق باعدارشامى قوسىلادى، دەپ حابارلايدى almaty-akshamy.kz
جوبانى ىسكە اسىرۋدىڭ ءبىرىنشى كەزەڭى 2021 جىلى، جقبج -عا 93 باعدارشام قوسىلعان كەزدە باستالدى. سونىمەن قاتار، ورتالىق باسقارۋ پۋنكتىنىڭ ءۇي-جايلارىن، مامانداندىرىلعان جابدىقتاردى قايتا جاڭارتۋ جۇرگىزىلدى جانە باعدارلامالىق قامتاماسىز ەتۋ ورناتىلدى. سونىمەن بىرگە، جالپى ۇزىندىعى 56،5 كم بولاتىن جاڭا تالشىقتى-وپتيكالىق بايلانىس جۇيەسى سالىندى. بارلىق 93 باعدارشام نىسانى ەۋروپالىق ەلەكتروندى جابدىقتارمەن تولىقتىرىلدى.
الماتى قالالىق موبيلدىلىك باسقارماسىنىڭ حابارلاۋىنشا، بيىل باستالاتىن جوبانىڭ ەكىنشى كەزەڭى اياسىندا قالعان 498 باعدارشام نىساندارىن جاڭعىرتۋ جوسپارلانۋدا. جۇمىس وسى جىلدىڭ ەكىنشى جارتىجىلدىعىندا الماتى اكىمدىگىنىڭ جوبالىق كەڭسەسى اياسىندا باستالىپ، جىل سوڭىنا دەيىن اياقتالادى.
«سونىڭ ناتيجەسىندە باعىتتار بويىنشا ناقتى قوزعالىس قارقىنىن ەسكەرە وتىرىپ، ناقتى ۋاقىت رەجيمىندە قيىلىستارداعى جول قوزعالىسىن رەتتەۋ قامتاماسىز ەتىلەدى. ياعني، سەنسورلار مەن كامەرالار كەلەسى قيىلىسقا كولىكتىڭ ناقتى سانىن جىبەرەدى. تيىسىنشە، كەرى ساناق تاقتاسى ءاداپتيۆتى رەجيمدە جۇمىس ىستەيدى»، - دەدى قالالىق موبيلدىلىك باسقارماسى.
بولاشاقتا جۇيەگە باعدارلامالىق قامتاماسىز ەتۋدى بىرىكتىرۋ جوسپارلانۋدا، بۇل قيىلىستا مامانداندىرىلعان جانە قوعامدىق كولىككە باسىمدىق بەرۋگە جول اشادى.
