الماتى پوليسياسى جالپى جەدەل ىزدەستىرۋ ىس-شارالارىمەن قاتار ناشاقورلىقتىڭ الدىن الۋ جانە حالىقتىڭ ەسىرتكىگە قارسى يممۋنيتەتىن قالىپتاستىرۋ بويىنشا دا جۇمىستار جۇرگىزۋدە، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇل ىندەتتىڭ بارلىق جەرگە تارالعانى جاسىرىن ەمەس. ولاردى ينتەرنەت ارقىلى ساتۋدىڭ بايلانىسسىز جولدارى، ەلەكتروندى ءامياندار، بەتبەلگىلەر جانە قالالارىمىزدىڭ كوشەلەرى مەن ۇيلەرىندەگى گراففيتي جارنامالارى جۇرتشىلىقتى تولعاندىرادى. جىل باسىنان بەرى ەسىرتكىنى ناسيحاتتايتىن 9 مىڭعا جۋىق گراففيتي-سۋرەت انىقتالدى جانە ءوشىرىلدى. مۇنداي جازۋلاردى انىقتاۋ جانە جويۋ بويىنشا اكىمدىكتەرمەن، قوعامدىق ۇيىمدارمەن جانە ەرىكتىلەرمەن بىرلەسكەن جۇمىس ۇيىمداستىردىق. ەسىرتكى گراففيتيىن سالىپ جاتقاندار دا ۇستالدى. ولار قىلمىستىق جاۋاپكەرشىلىككە تارتىلدى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
سونداي-اق، ول قالا اكىمدىگى مەن ەرىكتىلەر وسى ماسەلەگە بەيجاي قارامايتىن ساراپشىلار، كاسىپكەرلەر مەن مەملەكەتتىك سەكتور وكىلدەرىنىڭ باسىن قوسىپ، بالالار مەن جاسوسپىرىمدەر اراسىنداعى ناشاقورلىق ماسەلەسىن جۇيەلى دەڭگەيدە شەشەتىن “Narkostop” جوباسىن قولعا العانىن جەتكىزدى.
«ولاردىڭ قاتىسۋىمەن ەسىرتكىنىڭ تارالۋى تۋرالى اقپاراتتى قامتيتىن گراففيتي جازۋلارىن انىقتاۋ جانە جويۋ بويىنشا الدىن الۋ ءىس-شارالارى جۇرگىزىلدى. “ەسىرتكىگە بىرگە قارسىمىز!!!” جانە “نازار اۋدارىڭىز! بەي-جاي قاراماڭىز” اتتى كىتاپشالار تاراتىلدى، وندا الماتى قالاسى پد ەسىرتكى قىلمىسىنا قارسى كۇرەس باسقارماسىنىڭنىڭ WhatsApp جەدەل جەلى تەلەفونىنىڭ ءنومىرى 8-705-549-70-25 كورسەتىلگەن. سونىمەن قاتار اتقارۋشى بيلىك ورگاندارىمەن، جەرگىلىكتى پوليسيا قىزمەتىمەن بىرلەسىپ، قالانىڭ ءبىلىم بەرۋ ۇيىمدارىندا پروفيلاكتيكالىق ءىس-شارالار: ناۋقاندار، سەمينارلار، دارىستەر، دوڭگەلەك ۇستەلدەر وتكىزىلۋدە»، – دەدى ە.الماعامبەتوۆ.
ەستەرىڭىزگە سالا كەتەيىك، بۇعان دەيىن جىل باسىنان بەرى الماتىدا 43 ەسىرتكى ساتۋشى ۇستالعانىن حابارلاعان بولاتىنبىز.