ينتەرنەت ارقىلى ەسىرتكى ساتىپ، ولاردى ايماق ىشىندە جاسىرۋمەن اينالىسۋ ءۇردىسى – وزەكتى ماسەلەلەردىڭ ءبىرى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«جىل باسىنان بەرى وسى قىلمىستىق ارەكەت بويىنشا 43 ەسىرتكى ساتۋشى اشكەرەلەنىپ، وقيعا ورنىندا ۇستالدى. مىسالى، جەدەل ىزدەستىرۋ ءىس-شارالارى بارىسىندا ءبىزدىڭ بولىمشە قىزمەتكەرلەرى جوعارى وقۋ ورىندارىنىڭ بىرىندە وقيتىن 19 جاستاعى ستۋدەنتتى ۇستادى. ودان سينتەتيكالىق ەسىرتكى زاتى بار 25 پوليەتيلەن بۋماسى تاركىلەندى. سونىمەن قاتار، ويىن-ساۋىق مەكەمەلەرىندە ەسىرتكىنى پايدالانۋ مەن وتكىزۋ دەرەكتەرىن انىقتاۋ بويىنشا ءىس-شارالار تۇراقتى تۇردە جۇرگىزىلۋدە. وسىعان دەيىن ماقساتتى ءىس-شارالاردىڭ ناتيجەسىندە تۇنگى كلۋبتاردىڭ بىرىندە ەسىرتكى ساتۋمەن اينالىسقان 21 جاستاعى بارمەن ۇستالىپ، ونىڭ جۇمىس ورنى مەن تۇرعىلىقتى جەرىندە “سينتەتيكا” تاركىلەنگەنى تۋرالى حابارلاعان بولاتىنبىز. وسىنداي ارنايى ءىس-شارالاردى قالاداعى ەكى ۇلكەن مەيرامحانادا جاسادىق. وندا اسپازدار ەسىرتكى ساتۋمەن اينالىسقان. ولار قاماۋعا الىندى»، – دەپ حابارلادى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.