الماتى پوليسياسى ءىرى كولەمدەگى تولەنبەگەن ايىپپۇلدارى بار جۇرگىزۋشىلەردى ۇستادى.
الماتى پوليسياسى جالعان مەملەكەتتىك نومىرلەردى پايدالاناتىن، كولىكتەرىنە ارنايى سيگنال بەرۋ قۇرالدارىن ورناتاتىن، كولىكتى ماس كۇيىندە باسقاراتىن جانە تولەنبەگەن ايىپپۇلدارى بار ءقاۋىپتى جۇرگىزۋشىلەردى انىقتاۋ جانە جاۋاپكەرشىلىككە تارتۋ بويىنشا ماقساتتى جۇمىستى جالعاستىرۋدا، دەپ حابارلايدى aqshamnews.kz Polisia.kz-كە سىلتەمە جاساپ.
سالىنعان اكىمشىلىك ايىپپۇلدار بويىنشا بەرەشەگى بار بورىشكەرلەردى اۆتوماتتى تۇردە انىقتايتىن اۆتوماتتاندىرىلعان اقپاراتتىق جۇيەلەردىڭ مۇمكىندىكتەرى كەڭىنەن قولدانىلادى. جىل باسىنان بەرى جەرگىلىكتى پوليسيا قىزمەتىنىڭ ىزدەستىرۋ بولىمشەلەرى پاترۋلدىك پوليسيا پولكى مەن مامانداندىرىلعان باتالون قىزمەتكەرلەرىنىڭ كومەگىمەن 200-گە جۋىق كولىك توقتاتىلىپ، مامانداندىرىلعان ايىپپۇل تۇراعىنا ورنالاستىرىلدى.
بۇل كولىكتەردىڭ جۇرگىزۋشىلەرىنىڭ جول قوزعالىسى ەرەجەلەرىن بۇزعانى ءۇشىن جالپى سومماسى 125 ميلليون 940 مىڭ تەڭگە كولەمىندە ايىپپۇلدارى بار. الماتى پوليسياسى تاعى دا قىلمىسقا “مۇلدەم توزبەۋشىلىك” قاعيداتتارىن، قۇقىقبۇزۋشىلىق ءۇشىن جازانىڭ بۇلتارتپاستىعىن، اكىمشىلىك ايىپپۇلداردى دەر كەزىندە تولەۋ قاجەتتىگىن ەسكە سالىپ، جول قوزعالىسى ەرەجەلەرىن قاتاڭ ساقتاۋعا شاقىردى.