ءىستى پوليسەيلەر انىقتاپ جاتىر.
جىگىتتىڭ جول جوندەۋ جۇمىسشىسىن قىلقىندىرىپ جاتقان ءساتىنىڭ ۆيدەوسى جەلىدە تارادى، دەپ حابارلايدى Almaty-akshamy.kz
ۆيدەو Instagram جەلىسىندەگى dorogi_almaty_official پاراقشاسىندا جاريالانعان.
ۆيدەودا قارا فۋتبولكا كيگەن جىگىتتىڭ جۇمىسشىنى جەرگە جىعىپ، قىلقىندىرىپ جاتقانى كورىنەدى. قاسىنان ءوتىپ بارا جاتقان كۋاگەرلەردىڭ ايعايىنان كەيىن جاس جىگىت جۇمىسشىنى بوساتتى. زارداپ شەگۋشى ورنىنان تۇرىپ، جولدىڭ ءبىر بولىگىن جاباتىن قورشاۋدى ورناتپاق بولعان. ال نارازى بولعان جۇرگىزۋشى ۇرىسىپ، كولىككە وتىرىپ، ورناتىلعان قورشاۋدى بۇزىپ، وقيعا ورنىنان كەتىپ قالعان.
الەۋمەتتىك جەلىدەگى جازبا اۆتورلارىنىڭ ايتۋىنشا، وقيعا گاگارين مەن ەسقارايەۆ كوشەلەرىنىڭ قيىلىسىندا بولعان.
الماتى قالالىق پوليسيا دەپارتامەنتى وقيعاعا قاتىستى مالىمدەمە جاسادى. ءقازىر بوستاندىق اۋداندىق پوليسيا ءبولىمىنىڭ قىزمەتكەرلەرى ۆيدەوداعى وقيعانىڭ ءمان-جايىن انىقتاۋدا.
"زارداپ شەككەن جۇمىسشى انىقتالدى. قۇقىق بۇزۋشىنىڭ جەكە باسى انىقتالىپ جاتىر. ونىڭ ارەكەتىنە قۇقىقتىق باعا بەرىلەدى"، - دەلىنگەن ۆەدومستۆو حابارلاماسىندا.