الماتى قالالىق كارديولوگيالىق ورتالىعىنا جۇگىنگەن 71 جاستاعى ناۋقاس قاتتى ەنتىگۋ مەن بۇكىل دەنەسىندەگى السىزدىككە شاعىمداندى. تەكسەرۋ جۇرگىزىلگەننەن كەيىن ونىڭ قولقا قاقپاقشاسىنىڭ ايقىن ستەنوزى انىقتالدى، دەپ حابارلايىد almaty-akshamy.kz
قولقا ستەنوزى - جۇرەك قاقپاقشاسىنىڭ تارىلۋى، ول ارقىلى جۇرەكتەن قان قولقاعا ەنىپ، ودان ءارى بۇكىل دەنەگە تارالادى. قولقا قاقپاقشاسىنىڭ ستەنوزى كەزىندە ورگاندار قاننىڭ جەتكىلىكسىز مولشەرىن الادى. مۇنداي دياگنوز قويىلعاننان كەيىن قىسقا ۋاقىت ىشىندە ولىمگە اكەلۋى مۇمكىن ءقاۋىپتى جاعداي. اۋرۋ ەمدەلمەسە، پاسيەنت ميوكارد ينفاركتىسى، مي يشەمياسى جانە ينسۋلت سياقتى اۋىر ءارى ومىرگە ءقاۋىپ توندىرەتىن اسقىنۋ بولۋى مۇمكىن.
ناۋقاسقا شۇعىل وتا جاساۋ قاجەت بولدى. وعان كەۋدە قۋىسىن كەسۋسىز فەمورالدى ارتەرياداعى كىشكەنە پۋنكسيا ارقىلى قولقا قاقپاعى TAVI وتاسى بارىسىندا اۋىستىرىلدى. وتانىڭ بۇل ءتۇرى حيرۋرگيالىق ارالاسۋدى كەسۋسىز جانە ەڭ از وڭالتۋ كەزەڭىمەن جۇرگىزۋگە مۇمكىندىك بەرەدى. ترانسكاتەتەرلى قولقا كلاپانىن يمپلانتاسيالاۋ (TAVI) - قولقا كلاپانىن اۋىستىراتىن مينيمالدى ءينۆازيۆتى پروسەدۋرا.
«وتا جەرگىلىكتى اۋىرسىنۋدى باسۋ ارقىلى جاسالدى، بۇل پاسيەنتتىڭ وتا كەزىندە ەسىن ءبىلىپ جاتۋعا مۇمكىندىك بەرىپ، ميدىڭ كۇيىن باقىلاۋعا جانە جەدەل سەرەبروۆاسكۋليارلىق بۇزىلىس تۇرىندەگى ىقتيمال اسقىنۋدىڭ الدىن الۋعا مۇمكىندىك بەردى. ءتوس سۇيەگىنىڭ كەسىلمەۋى، جاساندى قان اينالىمى قاجەتسىزدىگى، مينيمالدى جاراقات جانە تەز قالپىنا كەلۋ - TAVI وتاسىنىڭ نەگىزگى ارتىقشىلىعى. وتادان 3 كۇن وتكەن سوڭ ناۋقاس اۋرۋحانادان ۇيگە شىعارىلدى. ەنتىگۋ تولىعىمەن جويىلىپ، جالپى ءال-اۋقاتى ايتارلىقتاي جاقساردى»، - دەيدى قالالىق كارديولوگيالىق ورتالىقتىڭ ينتەرۆەنسيالىق كارديولوگى ايجان قۇلانبايەۆا.
مۇنداي TAVI وتالار ماڭىزدى، ويتكەنى ونى دەنساۋلىق جاعدايىنا بايلانىستى اشىق جۇرەك وتاسىن جاساي المايتىن ناۋقاستارعا جاساۋعا بولادى. مۇنداي وتا باۋىر مەن بۇيرەك قىزمەتى بۇزىلعان، سونىمەن قاتار، جۇرەك پەن وكپەنىڭ اۋىر دەرتى بار ەگدە جاستاعى ناۋقاستار ءۇشىن ماڭىزدى. سەبەبى جۇرەككە اشىق وتانى كوپتەگەن ەگدە جاستاعى ادام قاتار جۇرەتىن اۋرۋلاردىڭ بولۋىنا بايلانىستى شىداي المايدى.