الماتىداعى №7 قالالىق كلينيكالىق اۋرۋحانادا جۇرەكتىڭ نەگىزگى قان-تامىرلارىنداعى قان اينالىمىن قالپىنا كەلتىرۋگە باعىتتالعان وتالار بويىنشا شەبەرلىك كلاسى ءوتتى.
ينتەرۆەنسيوندىق حيرۋرگتەرگە تاجىريبە جيناقتاۋعا مۇمكىندىك بەرگەن شاراعا ەلىمىزدىڭ تۇپكىر-تۇپكىرىنەن ماماندار قاتىستى، دەپ حابارلايدى aqshamnews.kz.
№7 قكا باسپا ءسوز قىزمەتىنىڭ حابارلاۋىنشا، شەبەرلىك ساعاتىنا اۆستريانىڭ جەتەكشى ينتەرۆەنسيالىق كارديولوگى، كورونارلىق كۇرەتامىرلاردى ەمدەۋدە 15 جىلدان استام تاجىريبەسى بار اۋرەل توما شاقىرىلدى. توما قازاقستاندىق ارىپتەستەرىن جۇرەك قان-تامىرلارىنىڭ زاقىمدانعان بولىكتەرىندەگى قان اينالىمىن قالپىنا كەلتىرۋ تەحنيكاسىمەن تانىستىردى.
شەبەرلىك كلاسى بارىسىندا كورونارلىق ارتەريالاردىڭ زاقىمدانۋ دەڭگەيى جوعارى پاسيەنتتەرگە بىرلەسكەن 3 وتا جاسادى. دارىگەرلەردىڭ ايتۋىنشا، قان تامىرلارى بىتەلىپ، وككليۋزياعا ۇشىراعان كەزدە جۇرەك سوزىلمالى يشەمياعا شالدىعادى. سالدارىنان ناۋقاس ءجۇرىپ-تۇرعان سايىن ەنتىگىپ، جۇرەككە سالماق تۇسەدى، ستەنوكارديا، ياعني جۇرەك تۇسىندا اۋىرسىنۋ سەزىمى پايدا بولادى.
بۇگىن جاسالعان وتالاردىڭ نەگىزگى ماقساتى – كورونارلىق ارتەريالارداعى قان اينالىمىن قالپىنا كەلتىرۋ. ءبىراق وتكىزگىشتى بىتەلگەن، قابىرعالارىن كالسيي تۇزدارى باسقان كۇرەتامىر ارقىلى وتكىزۋ وڭاي شارۋا ەمەس. سوندىقتان مۇنداي وپەراسيالار مىندەتتى تۇردە حيرۋرگيالىق تەحنيكالارعا ماشىقتانعان ماماندار مەن زاماناۋي قوندىرعىلاردى قاجەت ەتەدى.
«وتا جاسالعان ناۋقاستاردىڭ ەكەۋى بۇعان دەيىن ينفاركت الىپ ءبىزدىڭ اۋرۋحاناعا جەدەل جاردەممەن تۇسكەن. ءتيىستى ەمىن العاننان كەيىن اۋرۋحانادان شىعارىلدى. كوروناروگرافيا جاساعان كەزدە ارتەريالاردا ترومب بارىن، باسقا كۇرەتامىرلاردىڭ دا جاپپاي سوزىلمالى وككليۋزياعا ۇشىراعانىن انىقتادىق. وسى جولى پاسيەنتتەر جوسپارلى تۇردە اۋرۋحاناعا جاتقىزىلىپ، ءمامس شەڭبەرىندە وتا جاساتتى. ءبىز وپەراسياعا جاعدايى وتە اۋىر ناۋقاستاردى، كۇردەلى كلينيكالىق جاعدايلاردى ىرىكتەپ الدىق. ناتيجەسى – تاماشا. ءبۇعان اۋرەل توما ارىپتەسىمىزدىڭ ءوزى تاڭ قالدى. جالپى، اۋرۋحانانىڭ تولىققاندى جابدىقتالۋى بىزگە وسىنداي وتالار جاساۋعا مۇمكىندىك بەرەدى. ءبىراق شەبەرلىك كلاسىندا جاسالعان وتالاردىڭ ورنى بولەك، ءبىز تاماشا تاجىريبە جيناقتادىق. اۆستريالىق ارىپتەسىمىزبەن ءتۇرلى كلينيكالىق جاعدايلاردى ورتاعا سالدىق، ءبىز ءۇشىن بۇل شارانىڭ پايداسى زور بولدى»، - دەيدى №7 قكا ينتەرۆەنسيوندىق حيرۋرگيا جانە اريتمولوگيا بولىمشەسى مەڭگەرۋشىسى ساكەن انارتايەۆ.
وتا بارىسىندا پاسيەنت وياۋ بولادى. پۋنكسيا ارقىلى تامىردىڭ ىشىنە ارنايى كاتەتەر ورناتىلىپ، بىتەلگەن ارتەريالار وتكىزگىشتىڭ كومەگىمەن تازارتىلادى. بۇل اۋىرتاتىن پروسەدۋرا ەمەس، سوندىقتان وتا ناركوزسىز جاسالادى. پۋنكسيا ورنى عانا ليدوكوين ەرىتىندىسىمەن جانسىزداندىرىلادى. ناتيجەسىندە جۇرەكتىڭ بۇلشىق ەتتەرى تولىققاندى جۇمىس ىستەي باستايدى. ناۋقاستار ءوزىن جەڭىل سەزىنىپ، ەنتىگۋ مەن جۇرەك تۇسىنىڭ اۋىرعانى باسىلادى.