وڭىرلىك كوممۋنيكاسيالار قىزمەتىندە الماتى قالاسى اكىمىنىڭ ورىنباسارى نۇرلان ءابدىراحىم قاتىسقان حالىقتى الەۋمەتتىك قولداۋ جانە تۇرعىنداردى جۇمىسپەن قامتۋ ماسەلەلەرىنە ارنالعان بريفينگ ءوتتى.
اكىمنىڭ ورىنباسارىنىڭ ايتۋىنشا، الماتى اكىمدىگىنىڭ باستى باسىمدىقتارىنىڭ ءبىرى – قالا تۇرعىندارىنىڭ ءال-اۋقاتىن ارتتىرۋ، الەۋمەتتىك وسال توپتارعا اتاۋلى كومەك كورسەتۋ، الەۋمەتتىك ينفراقۇرىلىمدى دامىتۋ جانە ءاربىر الماتىلىقتىڭ لايىقتى ءومىر سۇرۋىنە جاعداي جاساۋ.
مەگاپوليستە 2،2 ميلليوننان استام ادام تۇرادى، ولاردىڭ 370 مىڭعا جۋىعى الەۋمەتتىك وسال ساناتقا جاتادى. بۇل زەينەتكەرلەر، مۇمكىندىگى شەكتەۋلى جاندار، كوپبالالى وتباسىلار، ارداگەرلەر، جەتىم بالالار جانە وزگە دە ساناتتار.
بيىل الەۋمەتتىك قولداۋ شارالارىن ىسكە اسىرۋ ءۇشىن مەملەكەتتىك بيۋدجەتتەن 30،5 ملرد تەڭگە قاراستىرىلعان.
«الەۋمەتتىك تولەمدەردىڭ اتاۋلىلىعىن جانە اشىقتىعىن قامتاماسىز ەتۋ ماقساتىندا سيفرلىق قۇرالدار ەنگىزىلدى. سونىڭ ىشىندە FSM Social ءموبيلدى قوسىمشاسى بيۋدجەت قاراجاتىنىڭ تيىمدىلىگىن ارتتىرۋعا مۇمكىندىك بەرەدى»، — دەدى نۇرلان ءابدىراحىم.
بيىلعى جىلدىڭ 9 ايىندا 190 مىڭ ادامعا جالپى سوماسى 4،3 ملرد تەڭگە كولەمىندە الەۋمەتتىك كومەك كورسەتىلدى، ونىڭ ىشىندە از قامتىلعان وتباسىلارعا اتاۋلى الەۋمەتتىك كومەك تاعايىندالدى.
الماتىدا سونداي-اق حالىقتىڭ الەۋمەتتىك وسال توپتارىنىڭ (ءحاوت) قۇقىعىن قورعاۋ جانە ولارمەن ءوزارا ءىس-قيمىل جاساۋ جونىندەگى ۋاكىل ينستيتۋتى ەنگىزىلگەن. بۇل جۇيە ازاماتتاردىڭ ءوتىنىشىن جۇيەلى تۇردە قاراۋعا جانە قۇقىقتىق قورعاۋدى كۇشەيتۋگە باعىتتالعان.
جۇمىسپەن قامتۋ سالاسىنا دا ەرەكشە كوڭىل ءبولىنىپ وتىر. 23 مىڭ ادام بەلسەندى شارالارمەن قامتىلعان، ولاردىڭ 11،4 مىڭى تۇراقتى جۇمىسقا ورنالاسقان، 11 مىڭى سۋبسيديالاناتىن جۇمىس ورىندارىنا جىبەرىلگەن، 770 ادام كاسىبي وقۋدان وتكەن. سونىمەن قاتار، 433 جاس كاسىپكەر مەملەكەتتىك گرانت الىپ، ءارقايسىسىنا 1،5 ملن تەڭگەدەن بولىنگەن. ونىڭ 63%-ى كوپبالالى وتباسىلار.
زەينەت جاسىنداعى ازاماتتاردى ەڭبەك قىزمەتىنە تارتۋ ماقساتىندا «التىن جاس» جوباسى جۇزەگە اسىرىلۋدا، ونىڭ اياسىندا زەينەتكەرلەردىڭ ەڭبەكاقىسى 85 مىڭ تەڭگە مولشەرىندە سۋبسيديالانادى. 2025 جىلى بۇل باعدارلاماعا 487 زەينەتكەر قاتىسقان.
جۇرگىزىلىپ جاتقان ءىس-شارالاردىڭ ناتيجەسىندە الماتىدا جۇمىسسىزدىق دەڭگەيى 4،7%-دان 4،4%-عا دەيىن تومەندەدى، بۇل رەسپۋبليكالىق ورتاشا كورسەتكىشتەن تومەن.
«ءبىز الەۋمەتتىك وسال توپتاردى قولداۋعا، ينكليۋزيۆتى ورتانى دامىتۋعا جانە جاڭا جۇمىس ورىندارىن اشۋعا باعىتتالعان جۇيەلى الەۋمەتتىك ساياساتتى جالعاستىرىپ كەلەمىز. باستى ماقساتىمىز – ءاربىر تۇرعىننىڭ لايىقتى ءومىر ءسۇرۋى مەن ەرتەڭىنە دەگەن سەنىمىن ارتتىرۋ»، — دەدى قالا اكىمىنىڭ ورىنباسارى نۇرلان ءابدىراحىم.
سونىمەن قاتار، ول جاستاردى قولداۋ باعىتىندا سيفرلىق قۇرالداردىڭ بەلسەندى ەنگىزىلىپ جاتقانىن ايتتى. جوو مەن كوللەدج تۇلەكتەرى «Enbek.kz» پورتالى ارقىلى ونلاين-تاجىريبەدەن وتەدى، مۇندا تۇيىندەمەلەر مەن بوس جۇمىس ورىندارى جاريالانىپ، كەلىسىمشارتتار ونلاين جاسالادى. ال «Skills.enbek.kz» پورتالىندا جاستارعا ارنالعان «مانسابىڭدى قۇر» اتتى ونلاين-كۋرس ىسكە قوسىلعان. ول جۇمىسقا ورنالاسۋعا قاجەتتى بازالىق داعدىلاردى ۇيرەتەدى. سونداي-اق «Mansap.kompasy» پلاتفورماسى ارقىلى جاستار ماماندىقتار، وقۋ باعدارلامالارى، ەڭبەكاقى دەڭگەيى جانە مانساپتىق مۇمكىندىكتەر تۋرالى اقپارات الا الادى.