2022 جىلى 633 ادامدى جۇمىسپەن قامتۋ جوسپارلانۋدا.
الماتىدا «جاستار تاجىريبەسى»، «ءبىرىنشى جۇمىس ورنى»، «كۇمىس جاس» جوباسى جۇزەگە اسىرىلىپ جاتىر. بۇل تۋرالى بريفينگ بارىسىندا الماتى قالالىق جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جاستار پراكتيكاسى 29 جاستان اسقان ءبىلىم بەرۋ ۇيىمدارىنىڭ تۇلەكتەرى اراسىنان العان ماماندىعى بويىنشا جۇمىس ءوتىلى 12 ايدان اسپايتىن جۇمىسسىزدارعا ارنالعان. ەڭبەكاقىنى جۇمىسپەن قامتۋ ورتالىعى تولەيدى. بۇل 122 520 تەڭگە. 2022 جىلى 1000 ادامدى قامتۋ كوزدەلگەن»، - دەدى الماتى قالالىق جۇمىسپەن قامتۋ ورتالىعىنىڭ ديرەكتورى.
سونىمەن قاتار، ول «مەنىڭ العاشقى جۇمىس ورنىم» جوباسى تۋرالى ايتتى.
«قازىرگى ۋاقىتتا وقۋ ورىندارىن بىتىرگەن تۇلەكتەر ءۇشىن جاستار تاجىريبەسى ايتارلىقتاي قولداۋ بولىپ تۇر. ولاردى ەڭبەك ءوتىلى بولماعاندىقتان جۇمىسقا المايدى. سوندىقتان 29 جاسقا دەيىنگى جاستارعا، ونىڭ ىشىندە ەڭبەك ءوتىلى جوق NEET ساناتىنداعى جاستارعا 18 ايدان اسپايتىن مەرزىمگە ۋاقىتشا جۇمىس ورىندارىن قۇرۋدى كوزدەيتىن «مەنىڭ العاشقى جۇمىس ورنىم» جوباسى ىسكە قوسىلدى. مۇندا دا ەڭبەكاقى جۇمىسپەن قامتۋ ورتالىعى ارقىلى تولەنەدى. 30 اەك نەمەسە 91 980 تەڭگە»،- دەدى سپيكەر.
سونىمەن قاتار، الماتىدا «ۇرپاقتار ۇندەستىگى» جوباسى جۇزەگە اسىرىلۋدا. ول 2 جىل ىشىندە وقۋىن اياقتاعان، جاسى 29-دان اسپاعان ءبىلىم بەرۋ ۇيىمدارىنىڭ تۇلەكتەرىنە 6 ايدان اسپايتىن مەرزىمگە ۋاقىتشا جۇمىس ورىندارىن اشادى.
«الماتىلىقتاردىڭ اعا بۋىنىنا كەلەتىن بولساق، ولار ءۇشىن «كۇمىس ءداۋىر» جوباسى بار. ول زەينەتكەرلىك جاستاعى جۇمىسسىزدار ءۇشىن 12 ايدان اسپايتىن مەرزىمگە ۋاقىتشا جۇمىس ورىندارىن قۇرۋدى كوزدەيدى. جالاقىنىڭ ءبىر بولىگىن جۇمىسپەن قامتۋ ورتالىعى وتەيدى (ەڭبەكاقىدان 50%، ءبىراق 30 اەك-تەن اسپايدى). 2022 جىلى 633 ادامدى جۇمىسپەن قامتۋ جوسپارلانۋدا، قازىرگى ۋاقىتتا جۇمىس بەرۋشىلەر ءتىزىمى جاسالۋدا»،- دەدى ديليارا يمانقۇلوۆا.
ايتا كەتەيىك، بۇگىنگى كۇنى 13460 الماتىلىق جۇمىسسىز رەتىندە تىركەلگەن.