الماتىدا جۇمىسسىز جۇرگەن جاستارعا جاڭا مۇمكىندىك بەرىلدى

ديپلومى بار جاستار اقىلى تۇردە تاجىريبەدەن ءوتىپ، جۇمىس ىستەي الادى.

الماتىدا ديپلومى بار، ءبىراق ءۇش جىلدان بەرى جۇمىسسىز جۇرگەن جاستارعا جاڭا مۇمكىندىك بەرىلىپ وتىر. 29 جاسقا دەيىنگى جاستار «ەڭبەك» باعدارلاماسى اياسىندا تاجىريبەدەن ءوتىپ، جۇمىس ىستەي الادى، دەپ حابارلايدى Almaty-akshamy.kz.

الماتى جاستارىنا جاساپ جاتقان جاڭا مۇمكىندىكتەر تۋرالى 1 شىلدە كۇنى قالالىق حالىقتى جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆا «مەملەكەت باسشىسىنىڭ الماتىداعى قازىرگى تاڭداعى جۇمىس ورىندارىن ساقتاۋ جانە جاڭا جۇمىس ورىندارىن قۇرۋ جونىندەگى تاپسىرمالارىن ورىنداۋ» تاقىرىبىندا وتكەن ونلاين باسپا ءسوز ءماسليحاتىندا ايتتى.

«ەڭبەك» باعدارلاما اياسىندا بىزدە «جاستار تاجىريبەسى» اتتى باعدارلاما جۇزەگە استى. بۇل باعدارلاما بويىنشا بىزگە سۇرانىس، ءوتىنىش بىلدىرەتىن جاستار كوپ. ولار - جوعارعى وقۋ ورىندارىنىڭ، ارنايى ورتا ءبىلىم بەرۋ وقۋ ورىندارىنىڭ تۇلەكتەرى. ادەتتە بىزدە جۇمىس بەرۋشىلەر جۇمىسقا تاجىريبەسى بار مامانداردى الادى. ال ديپلومى بار جاستاردىڭ باسىم كوپشىلىگىنىڭ تاجىريبەسى جوق. سول سەبەپتەن ولار باعدارلاما اياسىندا اقىلى تۇردە تاجىريبەدەن وتەدى. تاجىريبەدەن ءوتۋ جۇمىسى 25 اەك بولادى، ءبىراق الماتى ۇلكەن شاھار بولعاندىقتان، 35 اەك تولەنەدى. وسى باعدارلاما اياسىندا جۇمىس بەرۋشىلەر دە جۇمىس ىستەگىسى كەلەتىن مامانداردى تاۋىپ جاتىر»، – دەدى الماتى قالاسى حالىقتى جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆا.