الماتىدا الەۋمەتتىك قولداۋدى كۇشەيتىپ، جۇمىسپەن قامتۋ باعدارلامالارى مەن ەڭبەك موبيلدىلىگى ورتالىعىنىڭ جۇمىسىنا كوپ كوڭىل ءبولىنىپ وتىر. وڭىرلىك كوممۋنيكاسيالار قىزمەتىندە وتكەن بريفينگتە جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ وسىلاي دەپ مالىمدەدى.
قاڭتار مەن شىلدە ارالىعىندا ەڭبەك موبيلدىلىگى ورتالىعىنا 46 مىڭنان استام الماتىلىق جۇگىنسە، ونىڭ 38،6 مىڭى جۇمىسسىز مارتەبەسىن العان. جۇمىسپەن قامتۋعا بايلانىستى بەلسەندى ءىس-شارالارعا 24 447 ادام تارتىلدى.
باستاۋىش كاسىپكەرلەر دە قولداۋعا يە بولدى: 169 ادام 1،5 ملن تەڭگە كولەمىندە مەملەكەتتىك گرانت الدى. ونىڭ 61،5%-ىن كوپبالالى وتباسىلار، قالعانىن مۇگەدەكتىگى بار ادامدار مەن مۇمكىندىگى شەكتەۋلى بالالارى بار وتباسىلار قۇرادى.
كاسىبي وقىتۋدىڭ ماڭىزى زور: 5،2 مىڭ ادام «باستاۋ بيزنەس» باعدارلاماسى مەن skills.enbek.kz پلاتفورماسى ارقىلى وقۋدان ءوتتى. 524 جۇمىسسىز ازامات جاڭا ماماندىق الىپ، مىندەتتى تۇردە جۇمىسقا ورنالاستىرىلدى. ولاردىڭ 215ء-ى وقۋ ورتالىقتارىندا، 309-ى جۇمىس بەرۋشىلەردىڭ جۇمىس ورنىندا تاجىريبەدەن وتكەن. باعدارلى باعىتتاعى ءىس-شارالار 26 مىڭ وقۋشىنى، ستۋدەنتتى جانە جۇمىسسىزدى قامتىدى.
ينكليۋزيۆتى ورتانى دامىتۋ اياسىندا «JOBCOACH» جوباسى ىسكە قوسىلدى. ول مۇگەدەكتىگى بار ادامداردى جۇمىسقا ورنالاستىرىپ، جۇمىسقا بەيىمدەلۋگە كومەكتەسەدى. 2025 جىلى وسى جوبامەن 300 ادامدى قامتۋ، ال 2030 جىلعا دەيىن 4 200 ەرەكشە قاجەتتىلىگى بار ازاماتتى قولداۋ جوسپارلانىپ وتىر.
جاستارعا ارنالعان «جاستار پراكتيكاسى» باعدارلاماسى جۇمىس ىستەيدى. بۇل — 35 جاسقا دەيىنگى، ماماندىعى بويىنشا تاجىريبەسى جوق جوعارى وقۋ ورنى تۇلەكتەرىنە ارنالعان اقىلى تاعىلىمداما. تاجىريبە مەرزىمى – ءبىر جىلعا دەيىن، اي سايىنعى تولەم – 30 اەك (117 960 تەڭگە). جىل باسىنان بەرى باعدارلاماعا 361 جاس قاتىسىپ، ولاردىڭ كوبى تاجىريبە العاننان كەيىن تۇراقتى جۇمىسقا ورنالاسقان. الماتىدا جاستاردى جۇمىسقا ورنالاستىرۋ، كاسىبي باعدار بەرۋ، كاسىپكەرلىكتى دامىتۋعا كومەك كورسەتۋ مەن كوۆوركينگ الاڭدارىن ۇسىنۋ بويىنشا 11 جاستار كوميۋنيتي-ورتالىعى جۇمىس ىستەيدى.
2025 جىلى الماتىدا 22 497 جۇمىس ورنى قۇرىلدى، ونىڭ ىشىندە 11 400ء-ى تۇراقتى جۇمىس ورنى. بۇل ءوز كەزەگىندە جۇمىسسىزدىق دەڭگەيىن 2024 جىلدىڭ ءبىرىنشى توقسانىنداعى 4،7%-دان 2025 جىلدىڭ ءبىرىنشى توقسانىندا 4،5%-عا دەيىن تومەندەتۋگە مۇمكىندىك بەردى.
«بۇل — رەسپۋبليكالىق ورتاشا كورسەتكىش دەڭگەيى»، – دەدى باسقارما باسشىسى باۋىرجان جاۋباسوۆ.