الماتىدا ناشاقورلىق پەن ەسىرتكىگە قارسى كۇرەس اياسىندا ۇيىمداستىرىلعان مارافونعا جقاج قىزمەتكەرلەرى قاتىستى.
الماتىدا جىلدام قيمىلدايتىن ارنايى جاساقتىڭ 50 قىزمەتكەرى مارافونعا قاتىستى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ماقسات – ناشاقورلىق پەن ەسىرتكى قىلمىسىنىڭ الدىن الۋ، سونداي-اق سالاۋاتتى ءومىر سالتىن ناسيحاتتاۋ. دەپارتامەنت باسشىلىعى جۇرتشىلىقتىڭ باستاماسىن جانە الماتىنىڭ يگى ءداستۇرىن قولدادى، ويتكەنى ءبىز ءبارىمىز ونىڭ تۇرعىندارىمىز. ءبىزدىڭ قىزمەتكەرلەر تاپسىرمانى تاماشا ورىندادى. جاۋىنگەرلىك ءبولىم تاعى ءبىر مارتە ءوزىنىڭ سپورتتىق دايىندىعى، ۇستامدىلىعى مەن ءتارتىبىنىڭ دەڭگەيىن كورسەتتى»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ەرجان ۇزابايەۆ.
ۇزابايەۆتىڭ ايتۋىنشا، دەنە شىنىقتىرۋ جانە سپورت، جارىستارعا قاتىسۋ پوليسيا قىزمەتكەرلەرىنە جەدەل تاپسىرمالاردى ءساتتى ورىنداۋعا ىقپال ەتەتىن جاڭا داعدىلاردى مەڭگەرۋگە كومەكتەسەدى.
«العاشىندا مارافونعا پوليسيا قىزمەتكەرلەرىن كوپتەپ تارتۋ جوسپارلانعان بولاتىن. الايدا اۋقىمدى جارىس كەزىندە قوعامدىق ءتارتىپتى قورعاۋدى پوليسيا قامتاماسىز ەتەتىنىن، ال قاتىسۋشىلاردىڭ ءجۇرىپ-تۇرۋ باعىتى بويىنشا پوليسيا قىزمەتكەرلەرى قىزمەتتە بولاتىنىن ەسكەرىپ، ازىرگە تەك ءبىر ءبولىمنىڭ وكىلدەرىن قاتىستىرىپ، ءوزىمىزدى شەكتەدىك. ويتكەنى جول قاۋىپسىزدىگى ماسەلەلەرى ءتارتىپ ساقشىلارىنىڭ كەلىسىلگەن جانە كاسىبي ىس-ارەكەتىنە بايلانىستى بولماق. الماتىلىق پوليسيا گارنيزونى قالانىڭ قوعامدىق ماڭىزى بار مادەني-سپورتتىق ءىس-شارالارىنا ءارقاشان بەلسەنە قاتىساتىنىن اتاپ وتكىم كەلەدى»، – دەدى ۇزابايەۆ.