ەرجان باباقۇماروۆ «جومارت جۇرەك-2021» مەسەناتتار بايقاۋىنىڭ جەڭىمپازدارىنا ماراپاتتار تاپسىردى
بۇگىن الماتىدا جىل سايىنعى «جومارت جۇرەك» بايقاۋىنىڭ قورىتىندىسى شىعارىلدى، دەپ حابارلايدى Almaty-akshamy.kz
«جومارت جۇرەك» بايقاۋى قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ «رۋحاني جاعىرۋ» باعدارلاماسى اياسىندا قۇرىلدى جانە مەملەكەت باسشىسى قاسىم-جومارت توقايەۆ العا قويعان كاسىپكەرلەر مەن جەكە تۇلعالاردىڭ قايىرىمدىلىق جوبالارىنا قاتىسۋلارىن جاناما ىنتالاندىرۋ تەتىكتەرىن ەنگىزۋ ماسەلەسىن شەشۋگە مۇمكىندىك بەرەدى.
بايقاۋدىڭ باستى ماقساتى – ەڭ جارقىن جانە ماڭىزدى قوعامدىق باستامالاردىڭ وڭ تاجىريبەسىن دارىپتەۋ ارقىلى قايىرىمدىلىق جاساۋدى ىنتالاندىرۋ جانە دامىتۋ.
الماتى اكىمىنىڭ ورىنباسارى ەرجان باباقۇماروۆ بايقاۋدىڭ لاۋرەاتتارىن ماراپاتتاپ، حالىقتىڭ ءال-اۋقاتىن جاقسارتۋعا جانە قالانىڭ گۇلدەنۋىنە قوسقان ۇلەستەرى ءۇشىن العىسىن ءبىلدىردى. بيىل الماتىدا قالانىڭ ينفراقۇرىلىمىن اباتتاندىرۋ مەن جاقسارتۋ بويىنشا ءىرى الەۋمەتتىك جوبالار جۇزەگە اسىرىلدى. الماتىنىڭ مەسەناتتارى ءتۇرلى باعىتتار – ءبىلىم، سپورت، مادەنيەت جانە ت.ب. بويىنشا بارىنشا اۋقىمدى قايىرىمدىلىق شارالارىن جۇزەگە اسىردى.
سىيلىقتار بەس نوميناسيا بويىنشا بەرىلدى. الماتىدا وتكەن بايقاۋدىڭ جەڭىمپازدارى:
«جىل تۇلعاسى» بەلسەندى قايىرىمدىلىق قىزمەتى ءۇشىن «Daco Motors KZ» ج ش س باس ديرەكتورى سىرىمبەك تاۋعا بەرىلدى. مەسەنات 8 500 وتباسىعا ازىق-تۇلىك سەبەتتەرىمەن جانە مەديسينالىق قىزمەتكەرلەرمەن قامتاماسىز ەتۋ ارقىلى كومەكتەستى. ناۋقاس بالالارعا ارنالعان وڭالتۋ ورتالىعىنىڭ قۇرىلىسىنا 20 ميلليون تەڭگە ءبولدى. «مەكتەپكە جول» باعدارلاماسى اياسىندا 100 بالاعا وقۋ قۇرالدارىن، 10 پلانشەت پەن 5 نوۋتبۋك الىپ بەردى. ءۇش وتباسىنىڭ تۇرعىن ءۇي ساتىپ الۋ ءۇشىن باستاپقى تولەمىنىڭ 30%-ىن تولەدى، بالالار ۇيىنە، «ساۋران»، «الاتاۋ» قايىرىمدىلىق قورلارىنا كومەك كورسەتەدى.
«جىل مەسەناتى» اتالىمى بەلسەندى مەسەناتتىق قىزمەتى ءۇشىن «METALL PROM GROUP» ج ش س ديرەكتورى دولكۋنتاي ابدۋلحاليلگە بەرىلدى.
كومپانيا قيىن جاعدايعا تاپ بولعان 5 مىڭ وتباسىعا ازىق-تۇلىك سەبەتتەرى تۇرىندە كومەك كورسەتتى. ول الماتىداعى جاس سپورتشىلارعا جانە ءبىرقاتار سپورت كلۋبتارىنا دەمەۋشىلىك جاسايدى. جاسوسپىرىمدەر اراسىنداعى رەسپۋبليكالىق جارىستاردى ۇيىمداستىرۋعا دەمەۋشىلىك كورسەتتى. دولكۋنتاي ابدۋلحاليل بيىل قايىرىمدىلىققا بارلىعى 88،7 ميلليون تەڭگە ءبولدى.
«تۋعان ولكە» اتالىمىنا كىشى وتاندى قولداۋ بويىنشا الەۋمەتتىك ماڭىزى بار جوبالاردى جۇزەگە اسىرعانى ءۇشىن مۇحامەتحان سابىرجان لايىق دەپ تانىلدى. ول 4 بالالار سپورت الاڭىنىڭ قۇرىلىسىنا دەمەۋشىلىك جاسادى، مۇقتاج وتباسىلارعا ۇيلەرىن جوندەۋگە 4 ميلليون تەڭگە كولەمىندە كومەك كورسەتتى.
«جىلدىڭ ۇزدىك ۇيىمى» نوميناسياسى قايىرىمدىلىق باعدارلاماسىن ءتيىمدى ىسكە اسىرعانى ءۇشىن «BAZIS-A Corp» جشس-نە تابىس ەتىلدى. كومپانيا بوستاندىق اۋدانىنداعى №146 مەكتەپكە 300 بالاعا ارنالعان قوسالقى كورپۋستى ءوز قارجىسىنا سالدى. كاسىپورىن №65 مەكتەپ اۋماعىندا 300 ورىندى كورپۋس سالۋدى جوسپارلاۋدا.
«جىلدىڭ ۇزدىك قامقورشىسى» اتالىمىمەن الەۋمەتتىك ماڭىزدى وزگەرىستەر مەن تۇرلەندىرۋ بويىنشا قايىرىمدىلىق كومەگى ءۇشىن «كومەتا» ج ش س ماراپاتتالدى. كومپانيا قايىرىمدىلىق شارالارىنا قاتىستى، مۇمكىندىگى شەكتەۋلى بالالارعا كومەك كورسەتەدى، ءموبيلدى اۋرۋحانالارعا سۋ جەتكىزۋگە دەمەۋشىلىك كومەك رەتىندە 10 ملن قارجى ءبولدى. ولار №1 بالالار ۇيىنە، «جانۇيا» ارنايى كەشەنىنە، №123، №149 بالاباقشالارعا جانە پەدياتريانىڭ عىلىمي ورتالىعىنا ۇنەمى كومەك كورسەتەدى.
«ءبىزدىڭ كومپانيا قايىرىمدىلىقپەن 10 جىل بويىنا اينالىسىپ كەلەدى. ءبىز بالالار ۇيىنە كومەكتەسەمىز، ينتەراكتيۆتى تاقتالار، وقۋ ويىندارى مەن كىتاپتار ساتىپ الدىق، بالالارعا ارنالعان تەگىن سپورت زالىن اشتىق، وتباسىلارعا ءۇي سالۋعا كومەكتەستىك. بۇل ماراپات - مەن ءۇشىن ۇلكەن موتيۆاسيا. جوعارى باعا قالاعا، تۇرعىندارعا كومەكتەسۋگە دەگەن ۇمتىلىسىمىزدى ودان ءارى ارتتىرادى»، - دەدى دولكۋنتاي ابدۋلحاليل.
ايتا كەتەرلىگى، مەسەناتتار مەگاپوليس پەن ونىڭ تۇرعىندارىنا تۇراقتى تۇردە كومەك كورسەتەدى. دەمەك، ۇيىمداستىرۋشىلار اتاپ وتكەندەي، مۇنداي ءىس-شارالار بيزنەس-قۇرىلىمداردى، مەسەناتتاردى، ۇكىمەتتىك ەمەس ۇيىمداردىڭ وكىلدەرى مەن ەرىكتىلەردى جاقسى ىستەر جاساۋعا ىنتالاندىرادى جانە مەيىرىمدىلىك يدەياسىن ناسيحاتتايدى.