الماتىدا 2024 جىلى ۇزىندىعى 250 كم 274 كوشەنى ورتاشا جوندەۋ جوسپارلانۋدا. قالانىڭ كوشە-جول جەلىسىنىڭ جالپى ۇزىندىعى 3097 كم قۇرايدى. جولداردىڭ جاقسى جانە قاناعاتتانارلىق جاعدايداعى ۇلەسىن اعىمداعى جىلى 92% - عا دەيىن جەتكىزۋ جوسپارلانۋدا.
قالالىق موبيلدىلىك باسقارماسىنىڭ حابارلاۋىنشا، جۇمىستاردى جازدا باستاۋ جوسپارلانۋدا، بۇل رەتتە 20 ماگيسترالدىق كوشەنى جوندەۋ 25 تامىزعا دەيىن، ال اۋداندىق كوشەلەردى جوندەۋ بيىلعى قازان ايىنىڭ سوڭىنا دەيىن اياقتالادى.
ءار كوشە سەگمەنتتىك قاباتتاعى ۋچاسكەلەرگە بولىنەدى. ۋچاسكەلەردە مەردىگەرلىك ۇيىمدار باسشىلارىنىڭ بايلانىس اقپاراتى بار ارنايى ستەندتەر ورناتىلادى. بارلىق سمەگمەنتتىك قاباتتار تۋرالى قالا تۇرعىندارىنا ب ا ق جانە الەۋمەتتىك جەلىلەر ارقىلى حابارلاناتىن بولادى، سونداي-اق جوندەلەتىن ۋچاسكەلەر «2گيس» جانە «ياندەكس كارتالار» سەرۆيستەرىندە كورسەتىلەدى.
جولدارداعى قاۋىپسىزدىكتى ارتتىرۋ ماقساتىندا ورتاشا جوندەۋ اياسىندا قوسىمشا ءقاۋىپسىز ورىندار مەن جاياۋ جۇرگىنشىلەر وتكەلدەرى قۇرىلاتىن بولادى. تروتۋارلار مەن زاقىمدالعان ارىق ناۋالاردى جوندەۋ جوسپارلانعان. فرەزەرلەنگەن ماتەريال قايتا پايدالانۋ ءۇشىن اۋدان اكىمدىكتەرىنە بەرىلەدى.
ايتا كەتەرلىگى، وتكەن جىلى پيلوتتىق رەجيمدە قالانىڭ 15 ماگيسترالدىق كوشەسىندە جوندەۋ كەزىندە جولعا جانە جارىققا توزىمدىلىكتى ارتتىرۋعا باعىتتالعان پوليمەراسفالتوبەتون پايدالانىلدى. مۇنداي قوسپالار توزۋعا ءتوزىمدى، جۇمسارتۋ تەمپەراتۋراسى جوعارى (65-70°C)، سوندىقتان ىستىققا كوپ اسەر ەتپەستەن وڭاي توتەپ بەرە الادى، الدەقايدا ۇزاعىراق قىزمەت ەتەدى – قازىرگى 5 جىل جۇمىس ىستەۋدىڭ ورنىنا 8-10 جىل. اعىمداعى جىلى بۇل تاجىريبە جالعاساتىن بولادى. ماسەلەن، پوليمەراسفالتبەتوندى ۇزىندىعى 57 كم بولاتىن 20 ماگيسترالدىق كوشەنى جانە اۋداندىق ماڭىزى بار ۇزىندىعى 19 كم 12 كوشەنى جوندەۋ كەزىندە قولدانۋ جوسپارلانىپ وتىر.
ەستەرىڭىزگە سالا كەتەيىك، مەگاپوليس تۇرعىندارىنا ىڭعايلى بولۋ ءۇشىن جول ينفراقۇرىلىمىنا ارنالعان ارنايى Telegram-ارنانىڭ @AlmatyJolybot چات-بوتى ىسكە قوسىلدى. ول ارقىلى قالا تۇرعىندارى قالا جولدارىنداعى شۇڭقىرلاردى جويۋعا ءوتىنىش بەرە الادى.