الماتى جولدارىندا “قورعاۋ – ءقاۋىپتى جۇرگىزۋشى” جۇيەسى جقە بۇزۋدىڭ 2 مىڭنان استام دەرەگىن انىقتادى.
الماتى قالاسى پد-نىڭ حابارلاۋىنشا، “قورعاۋ – ءقاۋىپتى جۇرگىزۋشى” دەرەكقورىنا جالعان مەملەكەتتىك نومىرلەرى جانە شەتەلدە تىركەلگەن متنب بار، ساقتاندىرۋ ءپوليسىنسىز جۇرگەن كولىكتەر تۋرالى مالىمەتتەردى ەنگىزۋ بويىنشا كۇندەلىكتى جۇمىستار جۇرگىزىلۋدە، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ەكى تاۋلىكتە پاترۋلدىك پوليسيا ەكيپاجدارى كورسەتىلگەن اۆتوماتتاندىرىلعان جۇيەنى پايدالانا وتىرىپ، جالعان مەملەكەتتىك تىركەۋ ءنومىرىن تاققان 30 جۇرگىزۋشىنى، مەملەكەتتىك ءنومىرى جوق 12 اۆتوكولىكتى، ساقتاندىرۋ ءپوليسى جوق 26 جۇرگىزۋشىنى، مىندەتتى تەحنيكالىق بايقاۋى جوق 27 جۇرگىزۋشىنى ۇستادى. تاعى 38-ىنە جول قوزعالىسى ەرەجەلەرىن بۇزعانى ءۇشىن تولەمەگەن ايىپپۇلدارىن تولەۋ تۋرالى حابارلاما بەرىلدى. وسى رەتتە، ماقساتتى شارالاردى جۇرگىزۋ كەزەڭىندە ينسپەكتورلار، جۇرگىزۋشىلەرىنىڭ ايىپپۇل بويىنشا ءىرى كولەمدە قارىزى بار شەتەلدىك تىركەۋدەگى ءۇش اۆتوكولىكتى ۇستاعانىن حابارلايمىز. ماسەلە مىنا سوممالار تۋرالى بولىپ وتىر: 1 013 853 تەڭگە، 741 246 تەڭگە جانە 649 356 تەڭگە. بۇل كولىكتەر مامانداندىرىلعان ايىپپۇل تۇراعىنا قويىلدى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ەرجان ۇزابايەۆ.
بولىمشەنىڭ حابارلاۋىنشا، قالادا جالعان مەملەكەتتىك نومىرلەردى پايدالاناتىن، كولىكتەرگە ارنايى بەلگى بەرۋ قۇرىلعىلارىن ورناتقان كولىك جۇرگىزۋشىلەرىن، سونداي-اق كولىكتى ماس كۇيىندە باسقارعان ادامداردى جاۋاپكەرشىلىككە تارتۋ بويىنشا ماقساتتى جۇمىستار جالعاسۋدا.