كولىك رەسەي فەدەراسياسىندا تىركەلگەن بولىپ شىقتى.
اۆتوماتتاندىرىلعان باعدارلامالىق جۇيەلەردىڭ مالىمەتى بويىنشا، وسى Audi اۆتوكولىگىنىڭ جۇرگىزۋشىسى از ۋاقىت ىشىندە 92 رەت جول قوزعالىسى ەرەجەسىن بۇزعان. ايىپپۇلدىڭ جالپى سوماسى 2،2 ملن تەڭگەدەن استام سومانى قۇرادى، دەپ حابارلايدى Almaty-akshamy.kz.
«اتالعان بۇزۋشىلىقتاردىڭ بارلىعى قالانىڭ بەينەجۇيەلەرى ارقىلى تىركەلگەن. جۇرگىزۋشى كوبىنەسە جىلدامدىقتى بۇزعان. ونى “قورعاۋ – ءقاۋىپتى جۇرگىزۋشى” اۆتوماتتاندىرىلعان جۇيەسى ارقىلى انىقتاپ، ۇستاۋ مۇمكىن بولدى. بۇرىن حابارلانعانداي، الماتى پوليسياسى جالعان مەملەكەتتىك تىركەۋىش نومىرلىك بەلگىلەرىن پايدالاناتىن، كولىكتەرگە ارنايى بەلگى بەرۋ قۇرىلعىلارىن ورناتقان، كولىكتى ماس كۇيىندە باسقارعان جانە تولەنبەگەن ايىپپۇلدارى بار كولىك جۇرگىزۋشىلەرىن انىقتاۋ جانە جاۋاپكەرشىلىككە تارتۋ بويىنشا ماقساتتى جۇمىستار جۇرگىزىلىپ جاتىر. جىل باسىنان بەرى “قورعاۋ – ءقاۋىپتى جۇرگىزۋشى” كەشەنى قالا جولدارىندا 3 مىڭ 501 قۇقىق بۇزۋشىلىقتى انىقتادى»، – دەيدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ەرجان ۇزابايەۆ.
سپيكەردىڭ ايتۋىنشا، جاقىندا الماتى جولدارىندا جۇرگىزۋشىلەردىڭ ءارقايسىسى 800 مىڭ تەڭگەدەن كەم ەمەس زاڭبۇزۋشىلىق جاساعان تاعى ەكى شەتەلدە تىركەلگەن كولىك ۇستالدى. ولاردىڭ كولىكتەرى دە مامانداندىرىلعان ايىپپۇل تۇراعىنا ورنالاستىرىلدى. الماتى پوليسياسى اكىمشىلىك ايىپپۇلداردى دەر كەزىندە تولەۋ قاجەتتىگىن تاعى دا ەسكە سالىپ، جول قوزعالىسى ەرەجەلەرىن قاتاڭ ساقتاۋعا شاقىردى.