الماتىدا جول جوندەۋ جۇمىستارى قارساڭىندا قالالىق موبيلدىلىك باسقارماسى باسشىسىنىڭ ورىنباسارى اسان بوستانوۆ جيەكتاستاردى اۋىستىرۋ ماسەلەسىنە قاتىستى تۇسىنىكتەمە بەردى، دەپ حابارلايدى aqshamnews.kz
1 ماۋسىمنان باستاپ قالادا ورتاشا جول جوندەۋ جۇمىستارى باستالادى. بيىل جالپى ۇزىندىعى 300 شاقىرىم بولاتىن 367 كوشە جوندەۋدەن وتپەك. سونىمەن قاتار، رايىمبەك باتىر جانە جەلتوقسان كوشەلەرى بويىندا BRT جەلىلەرىن سالۋ جالعاسىپ جاتىر.
«جيەكتاس ماسەلەسىنە جەكە توقتالعىم كەلەدى – بۇل تاقىرىپ ءاردايىم تۇرعىنداردى الاڭداتادى. ورتاشا جوندەۋ بارىسىندا دا، BRT جەلىسىن سالۋ كەزىندە دە جيەكتاستاردى ءىشىنارا اۋىستىرۋ قاراستىرىلعان. بۇل تەحنولوگيالىق تۇرعىدان قاجەت قادام. جالپى العاندا، گرانيت جيەكتاستار ۇزاق مەرزىمگە شىدايدى، الايدا كولىك قوزعالىسى قارقىندى قالادا ولار جول-كولىك وقيعاسى نەمەسە اۋىر تەحنيكانىڭ سوعىلۋى سالدارىنان ءجيى زاقىمدانادى. سوندىقتان جاڭا اسفالت توسەۋ الدىندا جيەكتاستار تەگىستەلەدى، بيىكتىگى رەتتەلەدى. سىنباعان، جارامدى جيەكتاستار قايتا قولدانىلادى. ال سىزات، جارىق، مەحانيكالىق زاقىم نەمەسە ستاندارتتان اۋىتقۋ بار ەلەمەنتتەر عانا اۋىستىرىلادى. ورتاشا جوندەۋ كەزىندە قالا بويىنشا ورتا ەسەپپەن جيەكتاستاردىڭ 3-5 پايىزى عانا جاڭارتىلادى»، — دەدى اسان بوستانوۆ.
ونىڭ ايتۋىنشا، BRT جوبالارى اياسىندا مەردىگەر ۇيىمدار 7 جىلدىق كەپىلدىك مىندەتتەمەلەردى ورىندايدى. ولار جول توسەمىنىڭ، جاياۋ جۇرگىنشىلەر ايماعى مەن جيەكتاستاردىڭ ساپاسىنا تولىق جاۋاپ بەرەدى.
«رايىمبەك باتىر داڭعىلى بويىنداعى BRT جەلىسىن سالۋ كەزىندە جولدىڭ گەومەتريالىق پارامەترلەرى تۇزەتىلەدى – كەيبىر بولىكتەرى كەڭەيتىلىپ، كەيبىرى تارىلادى. سونداي-اق، قوعامدىق كولىك ايالدامالارى ماڭىندا قاۋىپسىزدىك ارالشالارى ورناتىلادى. بۇل وزگەرىستەر جاعدايىنا قاراماستان قازىرگى گرانيت جيەكتاستاردى الىپ تاستاۋدى تالاپ ەتەدى. سول كەزدە بارلىق جيەكتاستار سۇرىپتالادى. اقاۋى جوق، قايتا پايدالانۋعا جارامدى تاستار تەگىستەلىپ، قايتا ورناتىلادى. بۇعان قوسا، قۇرىلىس-مونتاج جۇمىستارى باستالماي تۇرىپ، تەحنيكالىق جانە اۆتورلىق قاداعالاۋ تاراپىنان داڭعىل بويىنداعى جيەكتاستارعا ۆيزۋالدى تەكسەرۋ جۇرگىزىلدى. سونىڭ ناتيجەسىندە بيىكتىگى مەن ساپاسى تالاپقا ساي كەلمەيتىن، زاقىمدانعان جانە ءپىشىنى وزگەرگەن بولىكتەر انىقتالىپ، ولاردى اۋىستىرۋ كوزدەلىپ وتىر»، — دەدى قالالىق موبيلدىلىك باسقارماسىنىڭ ورىنباسارى.