الماتىدا جوعالىپ كەتكەن قىزدىڭ دەنەسى وزەن بويىنان تابىلدى

ءولىمنىڭ سەبەبىن انىقتاۋ ءۇشىن سوت-مەديسينالىق ساراپتاما تاعايىندالدى

الماتىدا ەكى كۇن بۇرىن جوعالىپ كەتكەن ۆيكتوريا سولداتوۆانىڭ دەنەسى تاۋداعى وزەن بويىنان تابىلدى، دەپ حابارلايدى Almaty-akshamy.kz.

الماتى قالالىق پوليسيا دەپارتامەنتىنىڭ مالىمەتىنشە، 18 قىركۇيەك كۇنى اۋەزوۆ اۋداندىق پوليسيا باسقارماسىنا جەرگىلىكتى تۇرعىننان 1988 جىلى تۋعان اپكەسى ۆ.ۆ.سولداتوۆانىڭ جوعالىپ كەتكەندىگى تۋرالى ارىز تۇسكەن.

«ارىزدانۋشىنىڭ ايتۋىنشا، 17 قىركۇيەك كۇنى ساعات 10:00 شاماسىندا ۆ.ۆ.سولداتوۆا ۇيدەن شىعىپ كەتىپ، قايتا ورالماعان. سونىمەن قاتار، ءسىڭىلىسىنىڭ سوزىنشە، اپكەسى ءوزىنىڭ جىگىتىنە تاۋعا باراتىنىن ايتقان، سالدەن سوڭ جىگىتكە ءوزىن ورمەكشى شاعىپ العانى تۋرالى جازعان»،- دەپ حابارلادى ۆەدومستۆودان.

ىزدەستىرۋ ءىس-شارالارى بارىسىندا تاۋلى ايماقتا وزەن بويىنان ۆ.ۆ.سولداتوۆانىڭ دەنەسى تابىلدى. مايىتتە زورلىق-زومبىلىق بەلگىلەرى جوق.

«ءولىمنىڭ سەبەبىن انىقتاۋ ءۇشىن سوت-مەديسينالىق ساراپتاما تاعايىندالدى. تەرگەۋ بارىسى ىشكى ىستەر مينيسترلىگى مەن الماتى قالالىق پوليسيا دەپارتامەنتى باسشىلىعىنىڭ باقىلاۋىندا»،- دەپ اتاپ ءوتتى پوليسيادان.

الماتى پوليسياسى جالعان اقپارات تاراتپاۋعا شاقىرادى جانە ق ر قك-نىڭ 274-بابىنا سايكەس جاۋاپكەرشىلىك تۋرالى ەسكەرتەدى.