پوليسەيلەر ونى ءبىر اي بويى ىزدەگەن.
ونىڭ جوعالعانى تۋرالى حابار 12 مامىردا تۇسكەن، دەپ حابارلايدى Almaty-akshamy.kz.
رەسمي مالىمەتكە سايكەس، 12 مامىردا تۇركسىب اۋداندىق پوليسيا باسقارماسىنا 17 جاستاعى قىزدىڭ جوعالعانى تۋرالى حابار تۇسكەن. ءتارتىپ ساقشىلارى ونى قالا اۋماعىنان ىزدەگەن. سونداي-اق، رەسپۋبليكا بويىنشا بارلىق پوليسەيگە سۋرەتى مەن دەرەكتەرى تاراتىلدى.
«8 ماۋسىمدا كوكشەتاۋ قالاسىنىڭ پوليسەيلەرى جوعالعان ادامعا ۇقساس قىزدى كورىپ، جەكە قۇجاتىن تەكسەرگەن. ول اقمولا وبلىسىنىڭ ورتالىعىندا جىگىتىمەن بىرگە جۇرگەن»، - دەيدى ءتارتىپ ساقشىلارى.
قالالىق پوليسيا باسقارماسى بىردەن الماتىعا حابارلاسىپ، اتا-اناسىنا ايتقان. جاۋاپ الۋ كەزىندە قىز بەن جىگىت كوكشەتاۋعا ادەيى قاشىپ كەتكەنىن ايتتى.
ەكەۋى ۇيدەن الىس جەرگە كەتۋگە تىرىسقان. كامەلەت جاسقا تولماعان قىز تۋىستارىنا تاپسىرىلدى.