الماتىدا، جەتىسۋ مەن الماتى وبلىستارىندا جەر سىلكىنىسى بولاتىنى بولجاندى

ءقازىر الماتى بولجاۋ پوليگونىنىڭ اۋماعىندا 47 ستانسيا جۇمىس ىستەيدى

الداعى اپتادا الماتى قالاسىنىڭ، الماتى جانە جەتىسۋ وبلىستارىنىڭ اۋماعىندا شامامەن 3-3،5 بالدى قۇرايتىن جەر دۇمپۋلەرى بولۋى ىقتيمال، دەپ حابارلايدى Almaty-akshamy.kz.

2023 جىلعى 10 ناۋرىزدا سەيسمولوگيا ينستيتۋتىندا سەيسميكالىق بولجاۋ كوميسسياسىنىڭ كەزەكتەن تىس وتىرىسىنىڭ قورىتىندىسى بويىنشا وتكەن بريفينگتە وسىنداي مالىمدەمە جاسالدى.

قازىرگى ۋاقىتتا الماتى بولجاۋ پوليگونىنىڭ اۋماعىندا (الماتى ق.، الماتى جانە جەتىسۋ وبلىستارى) 47 ستانسيا جۇمىس ىستەيدى.

ينستيتۋت بازاسىندا تۇراقتى بولجاۋ كوميسسياسى جۇمىس ىستەيدى، ونىڭ قۇرامىنا ءتورت عىلىمي زەرتحانانىڭ قىزمەتكەرلەرى مەن سەيسمولوگيالىق تاجىريبەلىك-ادىستەمەلىك ەكسپەديسيانىڭ (ستاە) قىزمەتكەرلەرى كىرەدى.

بريفينگ قورىتىندىسى بويىنشا سەيسمولوگيا ينستيتۋتىنىڭ ديرەكتورى داۋلەت سارسەنبايەۆ بيىلعى جىلى الماتى بولجاۋ پوليگونىنىڭ اۋماعىندا كۇشتى جانە جويقىن جەر سىلكىنىسى كۇتىلمەيتىنىن ايتتى.

"رەجيمدىك باقىلاۋدىڭ كەشەندى ستانسيالارى جەلىسىنەن كۇن سايىن الىناتىن سەيسمولوگيالىق، گەوفيزيكالىق، گيدروگەوديناميكالىق، گەوحيميالىق جانە باسقا دا دەرەكتەرگە (200 پارامەترگە دەيىن) تۇراقتى مونيتورينگ جۇرگىزىلەدى"،- دەلىنگەن حابارلامادا.

سەيسمولوگيا ينستيتۋتى قازاقستان رەسپۋبليكاسىندا سەيسميكالىق قاۋىپسىزدىكتى قامتاماسىز ەتۋ ماسەلەلەرى جونىندەگى ىرگەلى جانە قولدانبالى زەرتتەۋلەر سالاسىنداعى باستى ۇيىم بولىپ تابىلادى.