اكىمشىلىك كەدەرگىلەر الىنىپ، كاسىپكەرلەردىڭ قۇقىقتارى قورعالدى
الماتى قالاسىنىڭ سىبايلاس جەمقورلىققا قارسى كۇرەس قىزمەتى جەر ۋچاسكەسىن جالداۋ مەرزىمىن ۇزارتۋ كەزىندە اكىمشىلىك كەدەرگىلەر مەن بيزنەس-سۋبەكتىلەردىڭ قۇقىقتارىنا قىسىم جاساۋ فاكتىلەرىن انىقتادى، دەپ حابارلايدى Almaty-akshamy.kz.
ۆەدومستۆودان حابارلاعانداي، جەر كوميسسياسى ءوزىنىڭ مىندەتىنە كىرمەيتىن جەر ۋچاسكەسىن جاڭا مەرزىمگە جالداۋ شارتىن جاساسۋعا وتىنىمدەردى قاراستىرعان. وسىعان بايلانىستى دەپارتامەنت ۋاكىلەتتى ورگانعا بۇل تاجىريبەنى توقتاتۋدى جانە وتىنىشتەردى كەرى قايتارىپ الۋدى ۇسىندى.
«بۇگىنگى تاڭدا جەر كوميسسياسىنىڭ قاراۋىنداعى جەكە كاسىپكەرلەر مەن زاڭدى تۇلعالاردىڭ وتىنىشتەرى كەرى قايتارىلدى. سونداي-اق، جەر كودەكسىنىڭ 37-بابى تارتىبىندە ولارعا جەر ۋچاسكەلەرىنە ۋاقىتشا وتەۋلى جەر پايدالانۋ قۇقىقتارى جاڭا مەرزىمگە بەرىلدى. وسىلايشا دەپارتامەنتتىڭ ارالاسۋىنان سوڭ اكىمشىلىك كەدەرگىلەر الىنىپ، كاسىپكەرلەردىڭ قۇقىقتارى قورعالدى»،- دەپ جازدى الماتى قالاسىنىڭ سىبايلاس جەمقورلىققا قارسى كۇرەس قىزمەتىنىڭ باسپا ءسوز قىزمەتى.