الماتى قالاسىندا جەلتوقسان كوتەرىلىسىنە قاتىسىپ، اقتالعانداردىڭ سانى 516 ادامعا جەتتى، دەپ حابارلايدى almaty-akshamy.kz
«جەلتوقسان قاھارماندارىنىڭ ەرلىگىن ناسيحاتتاۋ ماقساتىندا دەرەكتى فيلم تۇسىرىلۋدە. ستۋدەنت جاستار اراسىندا حالىق قاھارمانى ق.رىسقۇلبەكوۆتىڭ قۇرمەتىنە بوكستان، ە.سىپاتايەۆتىڭ قۇرمەتىنە قازاقشا كۇرەستەن تۋرنير ۇيىمداستىرىلادى. قازاقتىڭ باتىر قىزدارى ل.اسانوۆانىڭ، س.مۇحامەدجانوۆانىڭ جانە ك.مولدانازاروۆانىڭ قۇرمەتىنە وڭىرلەردە وقۋشىلار اراسىندا شىعارماشىلىق پاتريوتتىق ءىس-شارا وتكىزىلەدى. جالپى، ەلىمىزدە جەلتوقسان قاھارماندارىنا ارنالعان الاڭدار اشۋ، ەسكەرتكىش، مونۋمەنتتەر ورناتۋ بويىنشا جۇمىس بيۋدجەتتىڭ مۇمكىندىكتەرىنە سايكەس جۇرگىزىلۋدە»، - دەپ جاۋاپ بەرەدى ەرالى توعجانوۆ.
ۆيسە-پرەمەردىڭ دەرەگىنشە، تاۋەلسىزدىك العان ۋاقىتتان بەرى ەلىمىزدە جەلتوقسان وقيعاسى مەن ونىڭ قاتىسۋشىلارى ەسىمىمەن 111 نىسان اشىلدى. بۇدان بولەك، ق ر پرەزيدەنتىنىڭ 1991 جىلعى 12 جەلتوقسانداعى № 540 جارلىعىنا سايكەس، ەلىمىزدە جەلتوقسان وقيعاسىنا قاتىسقان ازاماتتار قىلمىستىق، اكىمشىلىك جانە تارتىپتىك جاۋاپتىلىقتان بوساتىلدى.
«1986 جىلى جەلتوقسان كوتەرىلىسىنە قاتىسىپ، وقۋدان، جۇمىستان شىعىپ قالعان ازاماتتاردىڭ «اقتاۋ تۋرالى» انىقتامانى قولدانىستاعى زاڭناماعا سايكەس ءوزىنىڭ دالەلدى قۇجاتتارىن جەرگىلىكتى پروكۋراتۋرا ورگاندارىنا ۇسىنۋ ارقىلى الا الادى. انىقتاما الۋ ءتارتىبى بارىنشا جەڭىلدەتىلگەن. 2020 جىلى الماتى قالاسىندا اقتالعان جەلتوقساندىقتاردىڭ سانى 400 ادام بولسا، 2021 جىلى 516 ادامدى قۇرادى»، - دەدى ۇكىمەت باسشىسىنىڭ ورىنباسارى.