الماتىدا جازۋشى، سىنشى اشىربەك سىعايدىڭ قۇرمەتىنە مەموريالدى تاقتا ورناتىلدى

الماتىدا مەملەكەت جانە قوعام قايراتكەرى، مەملەكەتتىك سىيلىقتىڭ لاۋرەاتى، جازۋشى، تەاتر سىنشىسى، پروفەسسور اشىربەك سىعايدىڭ قۇرمەتىنە ورناتىلعان مەموريالدى تاقتا سالتاناتتى تۇردە اشىلدى، دەپ حابارلايدى اlmaty-akshamy.kz.

«بۇل تاريحي ماڭىزدى شەشىم دەپ ەسەپتەيمىن. بۇگىن اسا كورنەكتى تەاتر ۇيىمداستىرۋشىسىنا جانە سىنشىسىنا، قازاق ونەرىنىڭ شىنايى جانكۇيەرىنە ەسكەرتكىش تاقتا ورناتىلدى. اشىربەك اعانىڭ شىعارماشىلىق ءومىرى ءبىزدىڭ سۇيىكتى قالامىزبەن تىعىز بايلانىستى. ونىڭ ەسىمى، مۇراسى حالقىمىزدىڭ جادىندا، شاكىرتتەرىنىڭ ەسىندە ماڭگى قالادى»، – دەپ اتاپ ءوتتى الماتى اكىمىنىڭ ورىنباسارى ارمان قىرىقبايەۆ.

تەاتر سىنشىسىن ەسكە الۋعا تانىمال ونەر قايراتكەرلەرى، ونىڭ ىشىندە ءاسانالى ءاشىموۆ، دۋلات يسابەكوۆ، ۇلىقبەك ەسداۋلەت، مەدەتبەك تەمىرحان، نۇرلان ورازالين، ەسمۇحان وبايەۆ، ەلۋباي سماعۇل، قالي سارسەنباي، حافيز ەسىموۆ، باقىت بوكەباي، ەركىن جۋاسبەك، تالعات ەسەنالييەۆ، ت.ب جازۋشىلار مەن ارتىستەر كەلدى.

 مەموريالدىق تاقتا بەلگىلى تەاتر سىنشىسى 1980-1999 جىلدار ارالىعىندا 20 جىلعا جۋىق تۇرعان جىبەك جولى داڭعىلى، 12ا (س.ماۋلەنوۆ كوشەسىنىڭ قيىلىسى) مەكەنجايىنداعى ءۇيدىڭ قابىرعاسىنا ورناتىلدى.

اشىربەك سىعاي - قازاقستاننىڭ ساحنا ونەرىنىڭ دامۋىنا ەلەۋلى ۇلەس قوسقان قازاق تەاترتانۋ عىلىمىنىڭ نەگىزىن سالۋشىلاردىڭ ءبىرى، «ىڭكار شاق» (1978)، «سىر ساندىق»، «ساحناعا ساپار»، «جارناما الدىنداعى وي»، «ساحنا ساڭلاقتارى» (1998)، «تەاتر تاعىلىمى» (2003)، «ءان - تاعدىر»، «تاڭعاجايىپ تەاتر»، تاعى باسقا شىعارمالاردىڭ اۆتورى. ونىڭ ەڭبەكتەرى ونەر جانە تەاتر تەورياسى سالاسىنداعى وقۋلىقتارعا اينالدى.