الماتى تاۋلارىندا قار كوشكىنى بولدى

25-28 ناۋرىز ارالىعىندا قار كوشكىنى ءقاۋپى ساقتالادى.

قالا قۇتقارۋشىلارى الماتىلىقتاردان تاۋعا بارۋدان باس تارتۋدى سۇرادى. سەبەبى الداعى كۇندەرى قار كوشكىنى ءقاۋپى ساقتالادى، دەپ حابارلايدى Almaty-akshamy.kz. 

الماتى قالالىق توتەنشە جاعدايلار دەپارتامەنتىنىڭ مالىمەتىنە سايكەس، بۇگىن ساعات 10: 43-تە قوتىربۇلاق وزەنىنىڭ باسسەينىندە جاۋىن-شاشىننىڭ تۇسۋىنە بايلانىستى № 15 كوشكىن جيناعىندا وزدىگىنەن قار كوشكىنى بولدى.

تۇسكەن قار «پيونەر» تاۋ شاڭعىسى وتباسىلىق كۋرورتىنىڭ ارقاندى جولىنا دەيىن جەتتى.

«قازسەلدەنقورعاۋ» مم الماتى قالاسى بويىنشا ۇسىنىسى بويىنشا كەشەندە ورناتىلعان ارقاندى جولىنىڭ جۇمىسى 15 ناۋرىزدان باستاپ توقتاتىلعان بولاتىن. قوناق ۇيدە كەلۋشىلەر جوق. الدىن الا اقپارات بويىنشا زارداپ شەككەندەر مەن قيراۋلار جوق. كوشكىننىڭ كولەمىن ناقتىلاۋ ءۇشىن "قازسەلدەنقورعاۋ" قىزمەتكەرلەرى وقيعا ورنىنا جىبەرىلدى»، - دەپ حابارلادى قالالىق تجد باسپا ءسوز قىزمەتى.

ەستەرىڭىزگە سالا كەتەيىك، «قازگيدرومەت»  رمك 2022 جىلعى 24 ناۋرىزداعى №8 داۋىلدى ەسكەرتۋىنە سايكەس : ۇلكەن جانە كىشى الماتى وزەندەرىنىڭ باسسەيندەرىندە قار جامىلعىسىنىڭ جوعارى بيىكتىگى مەن تۇراقسىز جاعدايىنا بايلانىستى 25-28 ناۋرىز ارالىعىندا قار كوشكىنىنىڭ ءجۇرۋ ءقاۋپى ساقتالادى.