قالا اكىمىنىڭ ورىنباسارى ولجاس سماعۇلوۆتىڭ ايتۋىنشا، قالاداعى قۇرىلىستا ساپاسىز جۇمىسقا جول بەرىلمەيدى، دەپ حابارلايدى aqshamnews.kz
الماتى اكىمدىگى مەملەكەتتىك ساتىپ الۋعا قاتىساتىن مەردىگەر ۇيىمدارعا قويىلاتىن تالاپتاردى كۇشەيتىپ وتىر. قالا باسشىلىعى مەرزىمدى بۇزاتىن، ستاندارتتى ساقتامايتىن جانە مىندەتتەمەلەرىن ورىندامايتىن كومپانيالاردىڭ جولىن كەسەدى. بۇل تۋرالى الماتى وڭىرلىك كوممۋنيكاسيالار قىزمەتىندە وتكەن بريفينگتە حابارلاندى.
«ءبىزدىڭ ۇستانىمىمىز ايقىن ءارى قاتاڭ: الماتىدا تەك جاۋاپتى مەردىگەرلەر جۇمىس ىستەۋگە ءتيىس. جەڭىل پايدا تابۋعا، ساپاسىز جۇمىس ىستەۋگە كەلگەندەرگە مۇندا ورىن جوق. ءبىز ادال بيزنەستى قولدايمىز، ال ءتارتىپ بۇزعاندارعا ەڭ قاتاڭ شارا قولدانامىز»، – دەدى قالا اكىمىنىڭ ورىنباسارى ولجاس سماعۇلوۆ.
2025 جىلى توعىز ايدا الماتىدا ءبىرىڭعاي ساتىپ الۋ ۇيىمداستىرۋشىسى جالپى قۇنى 750 ميلليارد تەڭگەدەن اساتىن 1 274 بايقاۋ وتكىزگەن. ونىڭ باسىم بولىگى قۇرىلىس جانە ينفراقۇرىلىمدىق جوبالارعا تيەسىلى. الايدا كەيبىر مەردىگەرلەر بەلگىلەنگەن كولەممەن جۇمىس ىستەۋگە قاۋقارسىز بولىپ، نە تاپسىرىستاردى ءۇشىنشى تۇلعالارعا بەرىپ، ناتيجەسىندە جۇمىس كەستەسىنىڭ بۇزىلۋىنا سەبەپ بولىپ وتىر.
رەسپۋبليكالىق دەڭگەيدە ساتىپ الۋ ەرەجەلەرىنە وزگەرىستەر ەنگىزىلدى: ەندى مەردىگەرلەردى ىرىكتەۋ كەزىندە ولاردىڭ ورىنداعان جوبالارىنىڭ كۇردەلىلىگى ەسكەرىلەدى. بۇل تاجىريبە كەزدەيسوق نەمەسە ءالسىز كومپانيالاردىڭ قاتىسۋىن شەكتەيدى. سونىمەن قاتار قالا اكىمدىگى جاۋاپكەرشىلىكتى ارتتىرۋ جونىندە ۇسىنىستار جولدادى: مىندەتىنە سالعىرت قاراعان جەتكىزۋشىلەر تىزىمىندە بولۋ مەرزىمىن ۇزارتۋ مەن ايىپپۇل مولشەرىن ۇلعايتۋ كوزدەلگەن.