مەگاپوليستىڭ «جاسىل ەل» جاساعىنىڭ قاتارىنداعى بەلسەندىلەر سانى جىلدان جىلعا كوبەيىپ كەلەدى. وتكەن جىلى ۋاقىتشا ماۋسىمدىق جۇمىسپەن 14 پەن 29 جاس ارالىعىنداعى 1900 جاس قامتىلدى. بيىلدان باستاپ بۇل مەجە 35 جاسقا دەيىن دەپ وزگەرتىلدى. بۇل تۋرالى الماتى قالىسىنىڭ وڭىرلىك كوممۋنيكاسيالار قىزمەتىنىڭ الاڭىندا «جاسىل ەل» جوباسىنىڭ جەتەكشىسى زۋحرا يمانبايەۆا مەن «جاسىل ەل» جوباسىنىڭ ەكوساقشىسى مۇراتحان تاۋاسار ايتتى، دەپ حابارلايدى almaty-akshamy.kz
«جاسىل ەل» – مەكتەپ وقۋشىلارى، ستۋدەنت جانە جۇمىسسىز جاستاردى ماۋسىمدىق جۇمىسقا ورنالاستىرۋعا، رەسپۋبليكا بويىنشا ورمان القاپتارىن قۇرۋعا، سول ارقىلى قازاقستاننىڭ ەكولوگيالىق جاعدايىن جاقسارتۋعا باعىتتالعان جوبا. جوبا الماتى قالالىق جاستار ساياساتى ماسەلەلەرى باسقارماسىنىڭ قولداۋىمەن جۇزەگە اسىرىلادى.
«الەمدەگى جاھاندىق ەكولوگيالىق جاعداي كۇردەلەنە تۇسۋدە، قورشاعان ورتانى قورعاۋ ماسەلەسى وزەكتى بولىپ وتىر. وتكەن جىلدىڭ قاراشاسىندا مەملەكەت باسشىسى قاسىم-جومارت توقايەۆ الماتىلىقتارمەن كەزدەسۋىندە: «قورشاعان ورتا ازاماتتاردىڭ دەنساۋلىعى مەن ءومىر ءسۇرۋ ۇزاقتىعىنا تىكەلەي اسەر ەتەدى. سوندىقتان ەكولوگيا ماسەلەسى ءارقاشان مەنىڭ نازارىمدا». سونداي-اق «الماتى قالاسىن 2025 جىلعا دەيىن دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالار» بەكىتىلدى. ونىڭ باستى كورسەتكىشتەرىنىڭ ءبىرى – جىل سايىن كەمىندە 10 000 جاستى جۇمىسپەن قامتۋ كوزدەلگەن»، - دەدى ج.يمانبايەۆا.
سپيكەرلەردىڭ ايتۋىنشا، «جاسىل ەل» جاساعىنداعىلار قالانى كوگالداندىرۋدان بولەك، ەكولوگيالىق سەمينارلار مەن ترەنينگتەرگە، قالالىق جانە رەسپۋبليكالىق سەنبىلىكتەر مەن بالالار ءۇيى، قارتتار ءۇيى، ارداگەرلەر ۇيلەرىندەگى ەكو اكسيالارعا بەلسەندى قاتىسادى.
«جوبانىڭ وعان قاتىسۋشىلار ءۇشىن بەرەر ارتىقشىلىقتارى مول. جاستار بىر-بىرىمەن تانىسىپ، قالانىڭ دامۋىنا ۇلەستەرىن قوسادى»، -دەپ اتاپ ءوتتى م.تاۋاسار.
سونىمەن قاتار، جاساقتا ەكو پاترۋلدەر قۇرىلۋدا، ولار قالا اۋماعىندا رەيدتەر جۇرگىزىپ، ەكولوگيالىق بۇزۋشىلىق فاكتىلەرىن انىقتايدى.