«جاسىل ەل» جوباسى ەلىمىزدە 2005 جىلى باستاۋ الدى
الماتىدا «جاسىل ەل» ۋاقىتشا ماۋسىمدىق جۇمىسقا ورنالاستىرۋ جوباسىنىڭ سالتاناتتى اشىلۋى ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتىنىڭ ورتالىق مادەنيەت جانە دەمالىس ساياباعىندا وتكەن سالتاناتتى جيىنعا جاستار كوپ جينالدى.
«جاسىل ەل» جوباسى ەلىمىزدە 2005 جىلى باستاۋ الدى.
ونىڭ ماقساتى - قالانى اباتتاندىرۋ، كوشەتتەر ەگۋ، كوگالداندىرۋ بولۋدان بولەك، جاستار اراسىندا جۇمىسسىزدىق دەڭگەيىن ازايتۋ.
بۇل تۋرالى قازاقپارات تىلشىسىنە «جاسىل ەل» جوباسىنىڭ الماتى قالاسى بويىنشا جەتەكشىسى زۋحرا يمانبايەۆا ايتىپ بەردى.
«جاسىل ەل» جوباسى اياسىندا وتكەن جىلى 1900 جاس جۇمىسپەن قامتىلسا، بيىل 14-35 جاس اراسىندا 2100 جاستى جۇمىسپەن قامتۋ جوسپارلانىپ وتىر. «جاسىل ەل» جوباسى قالادا جاز مەزگىلىندە، ياعني، ماۋسىم، شىلدە، تامىز ايلارىندا وتەدى. «جاسىل ەلدىڭ» قۇرامىنداعى ءاربىر جاس اي سايىن 70 مىڭ تەڭگە جالاقى الادى. بۇگىنگى سالتاناتتى جيىنعا ماۋسىم ايىندا تىركەلگەن جاستار قاتىسىپ وتىر. ولاردىڭ اراسىندا جوعارى وقۋ ورىندارى، كوللەدج ستۋدەنتتەرى مەن جۇمىسسىز جاستار بار»، - دەدى زۋحرا يمانبايەۆا.
ونىڭ سوزىنشە، قالادا جاس ەكوپاترۋلدەر قۇرىلادى.
«جاسىل ەل» جوباسى اياسىندا ەكولوگيالىق سەمينار-ترەنينگتەر، ەكولوگيالىق اكسيالار وتەتىن بولادى. سونداي-اق، جاس ەكوپاترۋلدەر قۇرىلادى. ولار قالا اۋماعىنداعى ەكولوگيالىق قۇقىقبۇزۋشىلىقتى انىقتايدى، ياعني، رەيدتەر جۇرگىزەتىن بولادى. جالپى، جوبا اياسىندا قالانىڭ بارلىق اۋدانىندا تازالىق جۇمىستارى جۇرەدى»، - دەيدى «جاسىل ەل» جوباسىنىڭ جەتەكشىسى.
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ 4 كۋرس ستۋدەنتى دانا بىلدەبايەۆا «جاسىل ەل» جوباسىنا قاتارىنان ءتورتىنشى جىل قاتىسىپ كەلەدى.
«جاسىل ەلگە» كەلگەلى كوپ دوستار تاپتىم. ونىڭ ۇستىنە قالانىڭ تازالىعىنا ۇلەسىمدى قوساتىنىما وتە قۋانىشتىمىن. اتا-انام دا وسى جوباعا قاتىسىپ جۇرگەنىمە ءدان ريزا»، - دەيدى ول.
«جاسىل ەل» جوباسى بىرىنشىدەن اسەم قالامىزدى كوگالداندىرۋ بويىنشا جاستارعا بەرەر تاربيەلىك ماڭىزى زور، ەكىنشىدەن جاتاقحانا تەگىن بولادى، ۇشىنشىدەن 70 مىڭ تەڭگە ايلىق الادى.
بۇل تۋرالى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ 2-كۋرس ستۋدەنتى الشىن ابديكامال ايتتى.
«وسىنىڭ ءبارى ءبىز ءۇشىن ۇلكەن كومەك. الماتى - ەلىمىزدەگى تابيعاتى اسەم قالانىڭ ءبىرى. ءبىز بولساق سول اسەم تابيعاتتى ساقتاۋعا ءوز ۇلەسىمىزدى قوسامىز»، - دەدى الشىن ابديكامال.