ۆاكسينا سالعىزعان ەگدە ادامدار قاتارى قالىڭ
الماتى قالاسىندا ءبىر تاۋلىكتە 3 767 ادام كوروناۆيرۋسقا قارسى ۆاكسينا سالدىردى. بۇل تۋرالى قالالىق قوعامدىق دەنساۋلىق ساقتاۋ باسقارماسى ءمالىم ەتتى، دەپ حابارلايدى Almaty-akshamy.kz
«19 قاڭتار كۇنى 3 767 الماتىلىق ۆاكسينا سالدىردى. ۆاكسينا سالدىرعاندار سانى بويىنشا الماتى قالاسى الدىڭعى ورىندا. وتكەن جىلدىڭ 1 اقپانى مەن بيىلعى 19 قاڭتار ارالىعىندا قالادا 1 092 822 تۇرعىن ۆاكسينانىڭ ءبىرىنشى كومپونەنتىن، 1 040 794 ادام ەكىنشى كومپونەنتىن سالدىرعان. ونىڭ ىشىندە 123 697 ادامنىڭ جاسى 60-تان اسقان»، - دەپ حابارلادى باسقارمادان.
بۇگىنگى تاڭدا Pfizer (Comirnaty) كومپانياسىنىڭ ەكپەسىن 35 158 ادام سالدىردى. ونىڭ ىشىندە 1913 جۇكتى ايەل، 7 392 بالا ەمىزەتىن انا جانە 25 853 ءجاسوسپىرىم بار. ريەۆاكسينالاۋدان 98 762 الماتىلىق ءوتتى.
«بۇگىنگى تاڭدا قالادا مەديسينالىق ۇيىمداردا 119 ۆاكسينالاۋ پۋنكتى جۇمىس ىستەيدى. 140 ۆاكسينالاۋ بريگاداسىندا 522 مەديسينا قىزمەتكەرى جۇمىلدىرىلعان»، - دەپ اتاپ ءوتتى الماتى قالاسى قوعامدىق دەنساۋلىق باسقارماسىنىڭ باسپا ءسوز قىزمەتى.