بۇل جوباعا قازاقستاننىڭ ءتۇرلى وڭىرلەرىنەن 11 مەكتەپ پەن 6 جاستاردىڭ رەسۋرستىق ورتالىعى قاتىسادى.
الماتىدا جاڭا اشىلعان ورتالىقتا الەۋمەتتىك وسال توپتارداعى جاستارعا بيزنەس نەگىزدەرىن، الەۋمەتتىك كاسىپكەرلىكتى، تايم مەنەدجمەنت سياقتى ماڭىزدى داعدىلارعا تەگىن ۇيرەتەدى، دەپ حابارلايدى Almaty-akshamy.kz.
«قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى بۇۇ بالالار قورىمەن (يۋنيسەف) بىرلەسىپ، الماتىدا جاستارعا ارنالعان Samgau UpShift جوبالىق كەڭسەسىن اشتى. ول الەۋمەتتىك وسال توپتارداعى جاستاردىڭ بيزنەس نەگىزدەرىن، الەۋمەتتىك كاسىپكەرلىكتى، تايم مەنەدجمەنتتى، سىني، شىعارماشىلىق جانە كرەاتيۆتى ويلاۋدى، كوممۋنيكاتيۆتىك جانە كوشباسشىلىق داعدىلاردى، كوماندالىق جۇمىستى تەگىن ۇيرەنۋى ءۇشىن قۇرىلعان. جوباعا قاتىسۋ ءۇشىن jashome.org سايتىندا ءونلاين-وتىنىمدى تولتىرۋ قاجەت»، – دەلىنگەن مينيسترلىكتىڭ باسپا ءسوز قىزمەتى تاراتقان حابارلامادا.
بۇدان باسقا، بالالار مەنتوردىڭ سۇيەمەلدەۋىمەن وزدەرىنىڭ بيزنەس-يدەيالارىن ىسكە اسىرۋ ءۇشىن كونكۋرستىق نەگىزدە گرانت الۋعا ۇمىتكەر بولا الادى.
«Samgau UpShift جوبالىق كەڭسەسىنىڭ اشىلۋى – ماڭىزدى وقيعا، سەبەبى بۇل مەكەمە – ينكليۋزيا ساتىسى، ول جاستارعا قوعامعا تولىق بەيىمدەلۋگە مۇمكىندىك بەرەدى، بۇل بولاشاق مۇمكىندىكتەردى نىعايتۋ جانە ودان ءارى تابىستى الەۋمەتتەنۋ ءۇشىن قاجەت»، – دەپ اتاپ ءوتتى ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى ەرلان اۋكەنوۆ.
ءوز كەزەگىندە قازاقستانداعى يۋنيسەف وكىلىنىڭ ورىنباسارى ۆەرونيكا ۆاششەنكو جوبالىق كەڭسەدە العان داعدىلار قازاقستاندىق جاستاردىڭ باسەكەگە قابىلەتتىلىگىن ارتتىرۋعا ىقپال ەتەتىنىنە سەنىم ءبىلدىردى.
«جاھاندانۋ جانە تەحنيكالىق پروگرەسس ەڭبەك نارىعىنداعى تالاپتاردى ۇنەمى ارتتىرادى، ەگەر جاسىنا بايلانىستى جۇمىس تاجىريبەسى بولماسا، ولارعا ساي كەلۋ قيىن. سوندىقتان كاسىپكەرلىك، توپتىق جۇمىس جانە ىنتىماقتاستىق داعدىلارىن دامىتۋ قازاقستاندىق جاستار ءۇشىن ولاردىڭ باسەكەگە قابىلەتتىلىگىن ارتتىرۋ ءۇشىن وتە ماڭىزدى»، – دەدى ول.
سالتاناتتى ءىس-شاراعا مينيسترلىك پەن قور وكىلدەرىنەن باسقا جوبالىق كەڭسەدە وقيتىن بالالار دا قاتىستى. ولار قوناقتارمەن ءوز يدەيالارىمەن ءبولىستى.
ايتا كەتۋ كەرەك، Samgau UpShift جوباسى بۇرىن تەك ونلاين-رەجيمدە ىسكە اسىرىلعان بولاتىن. ماسەلەن، كارانتين كەزىندە وقىتۋعا 1 مىڭنان استام جاس قاتىستى. ولارمەن بەيرەسمي ءبىلىم بەرۋ ءادىسناماسى بويىنشا سەرتيفيكاتتالعان مەنتورلار قاتارىنان ىرىكتەلگەن ترەنەرلەر جۇمىس جاسادى. ومىرلىك ماڭىزى بار داعدىلاردى وقىتۋ بويىنشا 30-دان استام سەمينار، 2 ونلاين بۋتكامپ وتكىزىلدى. 9 كوماندا شاعىن گرانتتار الىپ، ءوز بيزنەس-يدەيالارىن جۇزەگە اسىرۋدا. سونداي-اق، جوباعا قازاقستاننىڭ ءتۇرلى وڭىرلەرىنەن 11 مەكتەپ پەن 6 جاستاردىڭ رەسۋرستىق ورتالىعى قاتىسادى.
ەستەرىڭىزگە سالا كەتەيىك، Samgau UpShift– بۇل بۇۇ بالالار قورىنىڭ (يۋنيسەف) جانە ەڭبەكمينىنىڭ جاستارعا ارنالعان باعدارلاماسى، وندا ەڭ وسال توپتارعا (ايتۆ جانە باسقا سوزىلمالى اۋرۋلارى بار، مۇگەدەكتىگى بار، اتا-اناسىنىڭ قامقورلىعىنسىز قالعان جاستار) ەرەكشە كوڭىل بولىنەدى.
يۋنيسەف يننوۆاسيالىق زەرتحاناسىنىڭ فلاگماندىق باستاماسى بولىپ تابىلاتىن UPSHIFT ءادىسناماسىن پايدالانا وتىرىپ، باعدارلاما جاستاردى دامىتۋدىڭ، جاستاردىڭ الەۋمەتتىك يننوۆاسيالار مەن كاسىپكەرلىك سالاسىن يگەرۋدىڭ وزىق ادىستەرىن بىرىكتىرەدى.