الماتىدا جاستارعا ارنالعان كرەاتيۆتى حاب سالىنادى

بۇگىن المالى اۋدانىندا الماتى اكىمى ەربولات دوسايەۆ تۇرعىندارمەن كەزدەستى.

وندا اۋدان تۇرعىندارى قالا اكىمىنە سۇراقتارىن جولدادى، دەپ حابارلايدى Almaty-akshamy.kz

«قالادا گوگول-بايتۇرسىنوۆ كوشەلەرىنىڭ قيىلىسىندا دەپو بار. تۇرعىندار سول جەردەگى سكۆەردى بۇزۋدى سۇرايدى بۇكىل اۋماقتى بولماسا دا، كەم دەگەندە ونىڭ ءبىر بولىگىن»، - دەگەن ءوتىنىشىن ءبىلدىردى تۇرعىنداردىڭ ءبىرى.  

بۇل ساۋالعا:

«پاندەمياعا جانە جەكە ينۆەستوردىڭ باس تارتۋىنا بايلانىستى دەپو جوباسى بىرنەشە جىل بويى توقتاپ قالدى. جوبا قالانىڭ يەلىگىندە، بۇگىندە سمەتالىق قۇجاتتارى رەتكە كەلتىرىلۋدە. دەپو اۋماعىندا ساياباق سالۋ قاراستىرىلىپ جاتىر. جوباسى جامان ەمەس، ول قالا قۇرىلىسى كەڭەسىنە ۇسىنىلادى. ءبىر ايتا كەتەتىنى - جوبانى پايدالانۋدىڭ ءۇش جىلدىق مەرزىمىنەن اسىپ كەتكەندىكتەن، قۇنىن رەتتەۋ كەرەك. سمەتالىق قۇجاتتاما تامىز-قىركۇيەك ايلارىندا دايىن بولادى. جوبا ەسكى دەپونى تولىق قالپىنا كەلتىرۋدى، جاڭا عيمارات سالۋدى جانە بۇكىل اينالانى اباتتاندىرۋدى قاراستىرادى. بۇل جاڭا جاستار كەشەنى، الماتى قالاسىنىڭ شىعارماشىلىق ورتالىعى بولادى»، - دەپ جاۋاپ بەردى قالا اكىمى ەربولات دوسايەۆ.