جاستار زاڭنامانى جەتىلدىرۋ بويىنشا ءوز ۇسىنىستارىن ەنگىزە الادى.
الماتىدا مەملەكەتتىك جاستار ساياساتى ماسەلەلەرى جونىندەگى زاڭ جوباسىنىڭ تانىستىرىلىمى ءوتتى، دەپ حابارلايدى Almaty-akshamy.kz.
شارا بارىسىندا ۇسىنىلعان وزگەرىستەر مەن تولىقتىرۋلاردى تالقىلاۋعا جاستار ۇيىمدارىنىڭ، رەسۋرستىق ورتالىقتاردىڭ وكىلدەرى، جاس بەلسەندىلەر مەن جاس كوشباسشىلار قاتىستى.
«كەزدەسۋگە اتالمىش زاڭ جوباسى بويىنشا جۇمىس توبىنىڭ جەتەكشىسى، ق ر پارلامەنتى ءماجىلىسىنىڭ دەپۋتاتى ەلنۇر بەيسەنبايەۆ پەن جاستار جانە وتباسى ىستەرى كوميتەتىنىڭ ءتوراعاسى شاحماردان بايمانوۆ قاتىستى»، - دەلىنگەن اقپارات جانە قوعامدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
جاستار وكىلدەرىنىڭ باستاماسى بويىنشا زاڭ جوباسى جانە باسقا دا مەملەكەتتىك قولداۋ شارالارى شەڭبەرىندە تالقىلاۋعا كەڭ اۋقىمدى ماسەلەلەر ۇسىنىلدى. ولاردىڭ ىشىندە كاسىپكەرلىكتى دامىتۋ، جاس وتباسىلاردى قولداۋ، شىعارماشىلىق جانە كرەاتيۆتى يندۋستريانى دامىتۋ ءۇشىن جاعداي جاساۋ جانە ت.ب. سونىمەن قاتار، جاستاردىڭ جاسىن 35-كە دەيىن ۇلعايتۋ قاجەتتىگى تۋرالى ماسەلە كوتەرىلىپ، باسقارۋشىلىق شەشىمدەر قابىلداۋ پروسەستەرىنىڭ اشىقتىعىن ارتتىرۋ، قوعامدىق ۇيىمدار مەن تاۋەلسىز ساراپشىلاردى الەۋمەتتىك-ەكونوميكالىق رەفورمالاردى تالقىلاۋعا تارتۋ ماسەلەسى دە تالقىلاندى.
«قازاقستاننىڭ جاستار اقپاراتتىق قىزمەتى» قق باسشىسى يرينا مەدنيكوۆا جاستار ءۇشىن تۇرعىن ءۇيدىڭ قولجەتىمدىلىگى ماسەلەلەرىن شەشۋدە جاڭا تاسىلدەر ەنگىزۋدى ۇسىندى.
المالى اۋداندىق جاستار رەسۋرستىق ورتالىعىنىڭ ۇيلەستىرۋشىسى باۋىرجان ماحانبەت الماتى مەكتەپتەرىنە جوو ستۋدەنتتەرى كەلىپ قارجىلىق ساۋاتتىلىقتى ارتتىرۋ ماسەلەلەرى بويىنشا فاكۋلتاتيۆتەر مەن ءبىرقاتار پايدالى كۋرستاردى وتكىزۋىن ۇسىندى.
قازىرگى ۋاقىتتا ق ر پارلامەنتى ماجىلىسىندە وسى زاڭ جوباسىن قاراۋ بويىنشا جۇمىس جۇرگىزىلۋدە. ونىڭ اياسىندا جاس قازاقستاندىقتار مەملەكەتتىك جاستار ساياساتى تۋرالى زاڭنامانى جەتىلدىرۋ بويىنشا ۇسىنىستار ەنگىزە الادى.
