الماتىدا حالىقارالىق جاستار كۇنىنە ارنالعان ونكۇندىك اياسىندا «الماتى – جاستار قالاسى» اتتى جاڭا مۋرالدىڭ اشىلۋ سالتاناتى ءوتتى. جوبانى الماتى قالاسى جاستار ساياساتى باسقارماسىنىڭ قولداۋىمەن شىعارماشىل جاستار جۇزەگە اسىردى.
اشىلۋ راسىمىنە الماتى قالاسى جاستار ساياساتى باسقارماسى باسشىسىنىڭ ورىنباسارى الماز كەنەسباي، بەلسەندى جاستار مەن اۋدان تۇرعىندارى قاتىستى.
«بۇگىندە الماتى قالاسىندا 700 مىڭنان استام جاس ازامات تۇرادى. بۇل – ەلىمىزدەگى ەڭ ءىرى ءارى بەلسەندى جاستار ورتالىعى. قالامىزدىڭ جاستارى ءارتۇرلى باعىتتا دامىپ كەلەدى: بىرەۋلەرى عىلىممەن اينالىسسا، ەندى بىرەۋلەرى سپورت، ونەر، كاسىپكەرلىك پەن ەرىكتىلىك سالالارىندا جەتىستىكتەرگە جەتۋدە. ءبىز بۇل مۋرال ارقىلى الماتى جاستارىنىڭ جان-جاقتىلىعىن، ولاردىڭ اشىقتىعىن، شىعارماشىل جانە زاماناۋي كوزقاراسىن كورسەتۋگە تىرىستىق. سونىمەن قاتار، بۇل جوبا جاس سۋرەتشىلەردىڭ شىعارماشىلىق الەۋەتىن قولداپ، ولاردى قالالىق مادەني كەڭىستىككە تارتۋ ماقساتىندا جۇزەگە اسىرىلدى»،– دەدى الماتى قالاسى جاستار ساياساتى باسقارما باسشىسىنىڭ ورىنباسارى الماز كەنەسباي.
ايتا كەتەيىك، الماتى قالاسىندا حالىقارالىق جاستار كۇنىن مەرەكەلەۋگە ارنالعان ونكۇندىك ءىس-شارالار 2025 جىلدىڭ 3 تامىزىندا باستاۋ العان. باعدارلاما اياسىندا ەكولوگيالىق اكسيالار، سپورتتىق تۋرنيرلەر، كۆەست ويىندارى، جاستار مەن الەۋمەتتىك جوبالار كورمەسى، Open Mic فورماتىنداعى كونسەرتتەر، بي سايىستارى جانە باسقا دا ءتۇرلى باعىتتاعى مادەني-بۇقارالىق شارالار ۇيىمداستىرىلۋدا.
فەستيۆالدىڭ قورىتىندىسى – 12 تامىز كۇنى بالۋان شولاق اتىنداعى سپورت كەشەنىندە وتەتىن GRAN FINAL بولماق. شارا اياسىندا قوناقتار مەن قالا تۇرعىندارىن قازاقستاندىق ەسترادا جۇلدىزدارىنىڭ قاتىسۋىمەن وتەتىن مەرەكەلىك گالا-كونسەرت، سونداي-اق الماتى قالاسىنىڭ ەڭ بەلسەندى جاستارىن ماراپاتتاۋ سالتاناتى كۇتەدى. ءىس-شاراعا كىرۋ – تەگىن.