27-29 شىلدە ارالىعىندا الماتىدا «تۇنگى قالاداعى بالالار» رەسپۋبليكالىق جەدەل-الدىن الۋ ءىس-شاراسى ءوتىپ جاتىر. الماتى قالالىق پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسى باستىعىنىڭ ورىنباسارى ايتان ەلەۋسىزوۆ وڭىرلىك كوممۋنيكاسيالار قىزمەتىندە وسى تۋرالى باياندادى.
سپيكەردىڭ ايتۋىنشا، ءىس-شارانىڭ باستى ماقساتى كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الىپ، تۇنگى ۋاقىتتا باقىلاۋسىز جۇرگەن بالالاردى انىقتاۋ، سونداي-اق قازاقستان رەسپۋبليكاسىنىڭ «بالا قۇقىقتارى تۋرالى» زاڭىن بۇزعانداردى جاۋاپقا تارتۋ ەكەن.
الماتىدا يۋۆەنالدى پوليسيا ينسپەكتورلارى مەن ۋچاسكەلىك پوليسەيلەردەن تۇراتىن ارناۋلى توپتار قۇرىلىپ، العاشقى كۇننىڭ وزىندە ەداۋىر زاڭبۇزۋشىلىق انىقتاعان:
• كامەلەتكە تولماعان 137 بالانىڭ ساعات 23:00-دەن كەيىن كوشەدە اتا-اناسىز جۇرگەنى انىقتالدى. اتا-انالارى قازاقستان رەسپۋبليكاسى اقبتك-نىڭ 442-بابىنىڭ 2-بولىگى بويىنشا اكىمشىلىك جاۋاپكەرشىلىككە تارتىلدى؛
• 163 ءجاسوسپىرىم ءمان-جايدى انىقتاۋ ءۇشىن پوليسيا باسقارماسىنا جەتكىزىلدى؛
• 10 ءجاسوسپىرىم پروفيلاكتيكالىق ەسەپكە قويىلدى؛
• كامەلەتكە تولماعاندار ىشىمدىك ىشكەن 9 فاكت تىركەلدى؛
• 6 ويىن-ساۋىق مەكەمەسىنىڭ تۇندە بالالاردى كىرگىزىپ، زاڭ بۇزعانى انىقتالدى
«اتا-انالارى اكىمشىلىك جاۋاپكەرشىلىككە تارتىلىپ، جاسوسپىرىمدەرمەن اڭگىمەلەستىك. ءبىز زاڭ بۇزعان ويىن-ساۋىق ورىندارىن دا تىركەۋگە الىپ، ءار ءىستى قاراپ، قولعا الىپ جاتىرمىز»، - دەدى ايتان ەلەۋسىزوۆ.
تۇنگى رەيدپەن قاتار، وقۋ ورىندارىندا، جاستار ورتالىقتارى مەن الەۋمەتتىك جەلىلەردە ءتۇسىندىرۋ جۇمىستارى جۇرگىزىلە باستاپتى. وندا بالالار مەن اتا-انالارعا ءىس-شارانىڭ ماقساتىن ايتىپ، زاڭ بۇزعان جاعدايدا جاۋاپقا تارتىلاتىنى تۋرالى اقپارات بەرىلەدى.
«تۇنگى قالاداعى بالالار» - بۇل ءبىر رەتتىك اكسيا ەمەس، بالالاردىڭ قۇقىعىن قورعاپ، قاراۋسىز قالۋدىڭ الدىن الىپ، ۇي-ىشىندەگى قولايسىزدىقتىڭ، جاسوسپىرىمدەر اراسىنداعى قىلمىستىڭ الدىن الۋ بويىنشا جاسالىپ جاتقان جۇيەلى جۇمىستىڭ ءبىر بولىگى. اسىرەسە جازعى دەمالىس كەزىندە مۇنداي رەيدتى ۇزبەي وتكىزگەلى وتىرمىز»، - دەپ تولىقتىردى ءوز ءسوزىن ايتان ەلەۋسىزوۆ.
پوليسەيلەردىڭ ايتۋىنشا، وسى ءىس-شارا العاشقى كۇننەن-اق ايتارلىقتاي ناتيجە بەرگەن. قالاداعى جاعدايدى باقىلاۋ كۇشەيىپ، الەۋمەتتىك تۇرعىدان ءقاۋىپتى جاعدايدا تۇرعان وتباسىلارمەن جۇمىس جانداندى.