الماتى قالاسىندا 9، 11، 13، 15 جاسقا دەيىنگى جاسوسپىرىمدەر اراسىندا قازاقستان رەسپۋبليكاسىنىڭ جەكەلەي چەمپيوناتى اياقتالدى.
قازاقستاننىڭ توعىزقۇمالاقتان مەملەكەتتىك جاتتىقتىرۋشىسى داۋلەت ابدىكارىموۆتىڭ ايتۋىنشا، اتالمىش ۇلتتىق ويىننىڭ كلاسسيكا، راپيد جانە بليس تۇرلەرىنەن وتكەن جارىسقا بارلىق وڭىردەن 500-گە جۋىق سپورتشى قاتىستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وتە تارتىستى وتكەن بىرىنشىلىك قورىتىندىسىندا كلاسسيكادان قوستاناي وبلىسىنىڭ كومانداسى ۇزدىك شىقسا، باتىسقازاقستاندىقتار ەكىنشى، اقتوبەلىكتەر ءۇشىنشى ورىنعا يە بولدى. راپيدتەن شقو وكىلدەرى چەمپيون اتانسا، بقو مەن قوستاناي ويىنشىلارى ەكىنشى، ءۇشىنشى ورىندى ءبولىستى. بليستەن تۇركىستان، اقتوبە، الماتى وبلىستارىنىڭ كوماندالارى ۇزدىك ۇشتىككە ىلىكتى. جالپىكوماندالىق ەسەپتە شىعىسقازاقستاندىقتار الدىنا جان سالماسا، اقتوبەلىكتەر ەكىنشى، قوستانايلىقتار ءۇشىنشى، باتىسقازاقستاندىقتار ءتورتىنشى، الماتى وبلىسى بەسىنشى ورىنعا تابان تىرەدى.
جەكەلەي سىندا كلاسسيكادان اقتوبەلىك نۇريددين ءادىلقايىر مەن باتىسقازاقستاندىق ءمولدىر باتۋللينا (9 جاس)، تەمىرلان عالىمجان (اقتوبە) مەن ايشا عاريفوللا (بقو، 11 جاس)، ەرنار ەركىن (شقو) مەن ايىم نازىموۆا (قوستاناي، 13 جاس)، ايدىن جاكييەۆ پەن ايىم الىبەك قىزى (ەكەۋى دە – قوستاناي، 15 جاس) چەمپيون اتاندى. راپيدتەن ءالي كەنجين (بقو) مەن نارگيز باقىت (قوستاناي، 9 جاس)، بەكسۇلتان دوسان (شقو) مەن ايدانا امانعالي (بقو، 11 جاس)، ەرجالىن ومىربەك (الماتى) پەن ماليكا اسەمحانوۆا (شقو، 13 جاس)، ازامات بيماعانبەت (اقتوبە) پەن ايانا يساحان (شقو، 15 جاس) جەڭىس تۇعىرىنا كوتەرىلدى. سونداي-اق بليستەن مۇحامەدنۇر ايدارحان مەن نازىم ارتىق (ەكەۋى دە – تۇركىستان، 9 جاس)، ەرنار ەرتاي (قىزىلوردا) مەن ايشا بەگالييەۆا (اقتوبە، 11 جاس)، ارسەن ەسەنتاي مەن ءنازيرا قۋاتجان قىزى (ەكەۋى دە – الماتى وبلىسى، 13 جاس)، ەركەبۇلان دوسان (شقو) مەن اقبوتا بەگالييەۆا (اقتوبە، 15 جاس) التىننان القا تاقتى. ەسكە سالا كەتەيىك، بۇدان بۇرىن ورالدا توعىزقۇمالاقتان ەرلەر اراسىنداعى قازاقستان چەمپيوناتى مارەگە جەتكەنىن جازعان بولاتىنبىز.