ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىندە «LG AI MediaLab» عىلىمي-زەرتتەۋ ورتالىعى اشىلدى.
«LG AI MediaLab» – نەيروجەلىلەردى مەديا جانە كوممۋنيكاسيا سالاسىندا قولداناتىن ەلىمىزدەگى العاشقى زەرتحانا. عىلىمي ورتالىقتا جي جانە Big Data كافەدراسىمەن بىرلەسە كەشەندى زەرتتەۋلەر جۇرگىزىلىپ، جاساندى ينتەللەكت كومەگىمەن ءتۇرلى تەحنولوگيالىق شەشىمدەر ازىرلەنەدى.
اتاپ ايتقاندا باسپا ءسوز قىزمەتتەرى ءۇشىن جاڭالىق ماتەريالدارىنان جوبا قۇرىلادى. ياعني AI كومەكشىسى باسپا ءسوز قىزمەتتەرىنىڭ تاقىرىپتارىنا سايكەس، جاڭالىق ماتىندەرىنىڭ جوبالارىن اۆتوماتتى تۇردە جاسايدى. بۇعان قوسىمشا ماركەتينگ ماقساتى ءۇشىن الەۋمەتتىك جەلىلەرگە ارنالعان كونتەنت ازىرلەنەدى. زەرتحانا ماقالالار مەن جاڭالىق ماتەريالدارىنداعى دەرەكتەردىڭ شىنايىلىعىن تەكسەرۋ ءۇشىن ارنايى ءبىلىم قورلارىن پايدالانا الادى. سونداي-اق جاساندى ينتەللەكت كومەگىمەن ستۋدەنتتىك گازەت شىعارىلادى.
اشىلۋ سالتاناتىنا قازۇۋ باسقارما ءتوراعاسىنىڭ ورىنباسارى – ءبىرىنشى پرورەكتور ەركىن دۇيسەنوۆ، LG Electronics Almaty Kazakhstan كومپانياسىنىڭ پرەزيدەنتى حاك ءحون كيم، جۋرناليستيكا فاكۋلتەتىنىڭ دەكانى قانات اۋەسباي، وقىتۋشى-پروفەسسورلىق قۇرام مەن ءبىلىم الۋشى جاستار قاتىستى.
ءىس-شارانى وقۋ ورداسىنىڭ پرورەكتورى ەركىن دۇيسەنوۆ قۇتتىقتاۋ سوزبەن اشىپ، عىلىمي ورتالىق جاساندى ينتەللەكت سالاسىن دامىتۋعا، ستۋدەنتتەردىڭ وسى باعىتتاعى جۇمىستارىن جەتىلدىرۋگە ايرىقشا ۇلەس قوساتىنىن جەتكىزدى.
«مەملەكەت باسشىسى قاسىم-جومارت توقايەۆ ءوز سوزىندە: «عىلىمي-تەحنيكالىق ۇدەرىس جاعدايىندا ەلىمىزدىڭ تەحنولوگيالىق جانە عىلىمي-يننوۆاسيالىق تاۋەلسىزدىگىن نىعايتۋ ءۇشىن بارشا مۇمكىندىكتى پايدالانۋ ماڭىزدى. بۇل تۇرعىدا جاساندى ينتەللەكتىنى دامىتۋ زور مۇمكىندىككە جول اشىپ وتىر»، – دەپ اتاپ وتكەن بولاتىن. قازۇۋ بازاسىندا جاساندى ينتەللەكت ورتالىعىن قۇرۋ – ۋنيۆەرسيتەتتىڭ ءبىلىم مەن تاجىريبەگە نەگىزدەلىپ، جاڭا ەكوجۇيە قالىپتاستىرۋعا باعىتتالعان ستراتەگيالىق قادامى»، – دەدى ەركىن دۇيسەنوۆ.
ءوز كەزەگىندە LG Electronics Almaty Kazakhstan كومپانياسىنىڭ پرەزيدەنتى حاك ءحون كيم:
«LG AI MediaLab» عىلىمي ورتالىعى – LG Electronics كومپانياسى مەن ءال-فارابي اتىنداعى قازۇۋ اراسىنداعى سەرىكتەستىكتىڭ سيمۆولى. بولاشاقتا اتالعان زەرتحانادا ءبىلىم الۋشى جاستار جاساندى ينتەللەكت سالاسىندا مول تاجىريبە جيناقتاپ، جەتىستىككە جەتەتىنىنە سەنىمدىمىن»، – دەدى.
جاساندى ينتەللەكت زەرتحاناسىنداعى ءبىلىم بەرۋ سيفرلىق تەحنولوگيالار مەن الەۋمەتتىك عىلىمدار توعىسىنداعى ءپانارالىق باعىتتا جۇزەگە اسادى. سونىڭ ارقاسىندا نەيروجەلىلەردىڭ وزىق تاجىريبەسى ءبىلىم بەرۋ ۇردىسىنە ەنگىزىلىپ، دەرەكتى تالداۋ، ۆيزۋالدى ستوريتەللينگ جانە ۇلكەن تىلدىك مودەلدەردى (LLM) بىرىكتىرۋگە جول اشىلادى. زەرتحانا جوعارى ساپالى كەسكىندەر جانە ۆيزۋالدى دەرەكپەن جۇمىس ىستەۋگە ىڭعايلى زاماناۋي «LG Ultra Gear» مونيتورلارىمەن جابدىقتالعان.
وتكەن جىلى قازاقستان مەن جۇڭگو باسشىلارىنىڭ مەملەكەتارالىق كەلىسىمى اياسىندا قازۇۋ-عا ورتالىق ازياداعى ەڭ قۋاتتى سۋپەركومپيۋتەر ورناتىلعان بولاتىن. «LG AI MediaLab» زەرتحاناسى سۋپەركومپيۋتەردىڭ مۇمكىندىگىن پايدالانۋ ماقساتىندا ورتاق دەرەكقورعا بىرىكتىرىلەتىن بولادى.