ساعادات نۇرماعامبەتوۆتى ەسكە الۋعا ارنالعان حالىقارالىق بوكس ءتۋرنيرى باستالدى
قازاقستاننىڭ تۇڭعىش قورعانىس ءمينيسترى، كەڭەس وداعىنىڭ باتىرى، №1 حالىق قاھارمانى ارميا گەنەرالى ساعادات نۇرماعامبەتوۆتىڭ 101 جىلدىعىنا ارنالعان حالىقارالىق بوكس ءتۋرنيرى استانا قالاسىندا باستالدى. بۇل تۋرالى Aqshamnews.kz سايتى حابارلايدى. جارىس قورعانىس مينيسترلىگى سپورت كوميتەتىنىڭ ۇيىمداستىرۋىمەن ارميا ورتالىق سپورت كلۋبىنىڭ بازاسىندا وتۋدە.
بيىل 28ء-شى مارتە وتكىزىلىپ وتىرعان بۇل ءداستۇرلى تۋرنير – ەلىمىزدىڭ اسكەري-سپورتتىق ومىرىندەگى ەڭ ءىرى شارالاردىڭ ءبىرى. اشىلۋ سالتاناتىنا وليمپيادا چەمپيونى ەرماحان يبرايموۆ، سونداي-اق قارۋلى كۇشتەردىڭ ارداگەرلەرى مەن سپورت سالاسىنىڭ بەدەلدى وكىلدەرى قاتىستى.
قورعانىس مينيسترلىگى سپورت كوميتەتىنىڭ ءتوراعاسى، ارميا ورتالىق سپورت كلۋبىنىڭ باستىعى پولكوۆنيك ارمان ابەۋوۆ ءوز سوزىندە:
«ساعادات قوجاحمەت ۇلى ەلىمىزدىڭ قارۋلى كۇشتەرىنىڭ قالىپتاسۋىندا باعا جەتپەس ءرول اتقارعان تۇلعا. ول ءبىز ءۇشىن باتىرلىق پەن اسكەري ادالدىقتىڭ ماڭگىلىك ۇلگىسى. وسىنداي تۋرنير ارقىلى جاستارعا ونىڭ ەرلىگىن ۇلگى ەتۋ – ءبىزدىڭ پارىزىمىز»، – دەدى.
تۋرنيرگە قازاقستان، رەسەي، ازەربايجان، قىرعىزستان، ارمەنيا، تاجىكستان، تۇرىكمەنستان، موڭعوليا، وزبەكستان جانە يران ەلدەرىنەن كەلگەن 200-دەن استام سپورتشى قاتىسۋدا. سونىمەن قاتار، بىرىككەن اراب امىرلىكتەرى مەن يران ەلدەرىنىڭ وكىلدەرى تۋرنيرگە باقىلاۋشى رەتىندە قاتىسىپ وتىر. جارىس 13 سالماق دارەجەسى بويىنشا وتۋدە.
ساعادات نۇرماعامبەتوۆتى ەسكە الۋعا ارنالعان بۇل تۋرنير – بۇرىنعى چەمپيوندار ءۇشىن ۇلكەن سپورتقا اپاراتىن العاشقى باسپالداق بولعان. بۇرىنعى جەڭىمپازدار قاتارىندا سەرىك ساپييەۆ، گەنناديي گولوۆكين، ۆاسيليي جيروۆ، دانيار ەلەۋسىنوۆ، باقتيار ارتايەۆ، جانىبەك ءالىمحان ۇلى جانە ءبىرجان جاقىپوۆ سەكىلدى اتى اڭىزعا اينالعان بوكسشىلار بار.
بيىلدان باستاپ تۋرنير چەمپيوندارىنا "سپورت شەبەرى" اتاعى رەسمي تۇردە بەرىلە باستايدى. بۇل – جارىستىڭ ماڭىزىن ودان ءارى ارتتىرىپ وتىر.
استانا تورىندەگى بۇل حالىقارالىق تۋرنير 30 مامىرعا دەيىن جالعاسادى. بۇل شارا تەك سپورتتىق دودا ەمەس، سونىمەن بىرگە ەل قورعانى بولعان تۇلعانىڭ ەرلىگىن ۇلىقتاۋعا ارنالعان پاتريوتتىق ءمانى زور ءىس-شارا. سپورتشىلار تەك جەڭىس ءۇشىن ەمەس، باتىر رۋحىنا تاعزىم رەتىندە دە رينگكە شىعۋدا.