الماتى قالاسى ءبىلىم باسقارماسىنىڭ قولداۋىمەن، جۇمىسشى ماماندىقتارىنىڭ جىلى قارساڭىندا جاسوسپىرىمدەر اراسىندا Jas Skills چەمپيوناتى ءوتتى. بۇل جوبانىڭ باستى ماقساتى – مەكتەپ وقۋشىلارىنا ماماندىق تاڭداۋ بارىسىندا باعىت-باعدار بەرۋ، وزدەرىن ءارتۇرلى سالالاردا سىناپ كورۋگە مۇمكىندىك جاساۋ، دەپ حابارلايدى aqshamnews.kz
– قازاقستان حالقىنا ارناعان جولداۋىندا پرەزيدەنت قاسىم-جومارت توقايەۆ ەكونوميكامىز ءۇشىن ماڭىزدى سالالاردا ماماندار تاپشىلىعىن جويۋ جانە كادر دايارلاۋدىڭ ماڭىزدىلىعىن اتاپ ءوتتى. جۇمىسشى ماماندىقتارى – كەز كەلگەن قوعامنىڭ دامۋىنىڭ نەگىزى. ولار كۇندەلىكتى ومىرىمىزدە ءبىزدى قورشاپ تۇرعان عيماراتتاردى، جولداردى، جيھازدى، كيىمدەردى جانە باسقا دا كوپتەگەن زاتتاردى جاسايدى. Jas Skills – جاستارعا ءوز شەبەرلىكتەرى مەن داعدىلارىن كورسەتۋگە مۇمكىندىك بەرەتىن بەدەلدى شارا، – دەپ مالىمدەدى الماتى قالاسى ءبىلىم باسقارماسىنىڭ باسشىسى سايران سايفەدەنوۆ.
بۇل چەمپيونات بىرنەشە جىلدان بەرى وتكىزىلىپ كەلەدى، الايدا بيىل العاش رەت شارا الماتى مەملەكەتتىك بيزنەس كوللەدجىنىڭ بازاسىندا ۇيىمداستىرىلدى. شاھاردىڭ 8-9-سىنىپ وقۋشىلارى اسپازدىق ونەردە ءوزارا جارىستى. ولار اسپازدىق شەبەرلىك، ناۋبايشىلىق، كونديتەرلىك ونەر جانە ۆيزۋالدى مەرچەندايزينگ پەن ۆيترينيستيكا سالالارىندا ب ا ق سىنادى.
قاتىسۋشىلاردىڭ شەبەرلىگىن كوللەدجدىڭ ارنايى پاندەر وقىتۋشىسى جانار قاپاسوۆا جانە شاقىرىلعان تاۋەلسىز ساراپشىلار – وقۋ ورنىنىڭ تۇلەكتەرى، قازىرگى تاڭدا مەيرامحانا بيزنەسىندە تابىستى جۇمىس ىستەپ جۇرگەن شەف-اسپازدار انتون ششەرباكوۆ پەن ابزال يسمايلوۆ باعالادى. قازىلار القاسى وقۋشىلاردىڭ سالات دايىنداۋ، بۋتەربرود جاساۋ جانە جەمىس-جيدەكتەردەن اسەم كومپوزيسيالار جاساۋ شەبەرلىكتەرىنە ەرەكشە نازار اۋداردى.
– مەن مۇنداي چەمپيوناتقا العاش رەت قازىلىق ەتۋدەمىن، – دەيدى انتون ششەرباكوۆ. – قازىلار القاسى تاعامداردىڭ ساپاسى مەن اسەمدىگىنە عانا ەمەس، سونداي-اق قاتىسۋشىلاردىڭ تارتىبىنە دە نازار اۋداردى. بۇل ءبىزدىڭ سالامىزدا وتە ماڭىزدى. وقۋشىلاردىڭ كوزدەرىندەگى ىنتا-جىگەردى كورىپ، قاتتى قۋاندىم. ەگەر ولار بولاشاقتا كاسىبي ومىرلەرىن مەيرامحانا بيزنەسىمەن بايلانىستىرسا، مىقتى باسەكەلەستەرگە اينالاتىنىنا سەنىمدىمىن. قازىرگى تاڭدا بۇل سالادا جاڭا باستاۋشى ماماندار ءۇشىن مۇمكىندىكتەر وتە كوپ.
ءار ساناتتا جەڭىسكە جەتكەن قاتىسۋشىلار ديپلومدار مەن گرانتقا كوللەدجگە تۇسۋگە مۇمكىندىك بەرەتىن سەرتيفيكاتتارعا يە بولدى. بۇل ولاردىڭ بولاشاق ماماندىقتارىن تاڭداۋدا ماڭىزدى قادام بولماق.