توتەنشە جاعدايلار مينيسترلىگىنىڭ داڭقتى قولباسشى ب. مومىش ۇلى اتىنداعى 28237 اسكەري بولىمىندە جاس تولىقتىرىلىم ساربازدارى سالتاناتتى تۇردە اسكەري انت قابىلدادى.
اسكەري انت ماتىنىندە زور ماعىنا جاتىر. بۇل تۋرالى وزدەرىنىڭ قۇتتىقتاۋ سوزدەرىندە اسكەري ءبولىم كومانديرى، پودپولكوۆنيك باعلان كەنبەيلوۆ، الماتى وبلىستىق توتەنشە جاعدايلار دەپارتامەنتى باستىعىنىڭ ورىنباسارى، پولكوۆنيك دانيار قاسىموۆ، جامبىل اۋدانىنىڭ اكىمى نۇرلان ەرتاس، الماتى قالالىق توتەنشە جاعدايلار دەپارتامەنتى ازاماتتىق قورعانىس باسقارماسىنىڭ باستىعى، مايور انۋار يۋسۋپوۆ، جامبىل اۋداندىق قورعانىس ىستەرى جونىندەگى ءبولىمىنىڭ باستىعى، مايور ەرنەست جانبولاتوۆ، جامبىل اۋداندىق توتەنشە جاعدايلار ءبولىمىنىڭ باستىعى ازاماتتىق قورعاۋ مايورى ەرسىن جاگيپاروۆ جانە ارداگەرلەر، قۇرمەتتى قوناقتار مەن جاس ساربازداردىڭ اتا-انالارى دا ايتىپ ءوتتى، -دەپ حابارلايدى Almaty-akshamy.kz قازاقپارات-قا سىلتەمە جاساپ.
جاس ساربازدار اسكەري دايىندىقتىڭ ءبىرىنشى كەزەڭىن اياقتادى، الداعى ۋاقىتتا ولار اسكەري قىزمەتتىڭ شەبەرلىگى مەن قۇتقارۋ دايىندىقتارىن مەڭگەرىپ، ساپتىق جانە دەنە دايىندىعىن جالعاستىرادى.
انت قابىلداپ، ناعىز سارباز اتانعان جاس جاۋىنگەرلەر الداعى ۋاقىتتا رەسپۋبليكا كولەمىندە ازاماتتىق قورعانىس سالاسىنداعى توتەنشە جاعدايلاردىڭ سالدارىن جويۋ جانە اپات بولعان جەرلەردە قۇتقارۋ جۇمىستارىن جۇرگىزۋ بويىنشا ءتۇرلى مىندەتتەردى ورىندايدى.
سونىمەن قاتار، شارا بارىسىندا جامبىل اۋدانىنىڭ اكىمى نۇرلان ەرتاس اباي وبلىسىنداعى الاپات ءورتتىڭ سالدارىن جويۋعا قاتىسقان اۋداندىق توتەنشە جاعدايلار ءبولىمىنىڭ ءورت سوندىرۋشىلەرى مەن ءبولىمنىڭ جاۋىنگەرلەرىنە العىسىن ءبىلدىرىپ، العىس حاتتارمەن ماراپاتتادى.
