5 ناۋرىز كۇنى الماتىدا ءداستۇرلى قالالىق ستۋدەنتتىك «Jas Gala-2025» فەستيۆالىنىڭ سالتاناتتى اشىلۋى وتەدى، دەپ حابارلايدى aqshamnews.kz.
بۇل تۋرالى الماتى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا جاستار ساياساتى باسقارماسىنىڭ وكىلدەرى مەن ۇيىمداستىرۋشىلار حابارلادى.
«Jas Gala» فەستيۆالى بيىل ءتورتىنشى رەت وتپەك. شارانىڭ باستى ماقساتى – تالانتتى جانە كرەاتيۆتى جاستاردى قولداۋ، ستۋدەنتتىك شىعارماشىلىقتى دامىتۋ.
«الماتى – جاستاردىڭ، سونىڭ ىشىندە ستۋدەنتتەردىڭ قالاسى. قالانىڭ 35 جوعارى وقۋ ورنى مەن 88 كوللەدجىندە ەلىمىزدىڭ تۇكپىر-تۇكپىرىنەن كەلگەن 286 مىڭنان استام ستۋدەنت ءبىلىم الۋدا. ولاردىڭ شىعارماشىلىق بەلسەندىلىگىن ارتتىرىپ، كاسىبي دامۋىنا ىقپال ەتۋ ماقساتىندا قالالىق اكىمدىك جىل سايىن ءتۇرلى ءىس-شارالاردى جۇزەگە اسىرادى. سونىڭ ىشىندە ەڭ جارقىن جوبالاردىڭ ءبىرى – كوكتەمگى ستۋدەنتتىك فەستيۆال «Jas Gala»، – دەدى جاستار ساياساتى باسقارماسى باسشىسىنىڭ ورىنباسارى مىندەتىن اتقارۋشى نۇرسۇلتان بەكقايىروۆ.
فەستيۆال ۆوكال، حورەوگرافيا، موبيلوگرافيا، تەاتر، اسپاپتا ورىنداۋ باعىتتارى بويىنشا وتكىزىلەدى. فەستيۆال ۋنيۆەرسيتەتتىك، جانە قالالىق كەزەڭدەردەن تۇرادى. ۋنيۆەرسيتەتتىك ىرىكتەۋدەن وتكەن تالانتتى جاستار ءوز وقۋ ورنىنىڭ نامىسىن قالالىق دەڭگەيدە قورعايدى.
فەستيۆالدىڭ جالپى جۇلدە قورى 8 500 000 تەڭگەنى قۇرايدى. ونىڭ ىشىندە ءار نوميناسياعا 1 500 000 تەڭگەدەن، «ەڭ ۇزدىك ستۋدەنتتىك توپ» سايىسىنا 1 000 000 تەڭگە جۇلدە قورى قاراستىرىلعان.
بايقاۋدا مادەنيەت جانە ونەر قايراتكەرلەرى، قوعامدىق پىكىر كوشباسشىلارى، ونەر ءجۇلدىزدارى قازىلىق ەتەدى.
جوبا جەتەكشىسى جۇلدىز جاقسىبايدىڭ ايتۋىنشا، «Jas Gala-2025» فەستيۆالىنىڭ باستى ەرەكشەلىگى – ونىڭ تاقىرىپتىق باعىتتىلىعى. بيىلعى فەستيۆال ۇلى جەڭىستىڭ 80 جىلدىعىنا، جۇمىسشى جاستار جىلىنا، قازاقستان حالقى اسسامبلەياسىنىڭ 30 جىلدىعىنا، ن.تلەندييەۆتىڭ 100 جىلدىعىنا، ش.قالداياقوۆتىڭ 95 جىلدىعىنا ارنالادى. ۇيىمداستىرۋشىلاردىڭ پىكىرىنشە، بۇل جاستاردىڭ پاتريوتتىق رۋحىن نىعايتىپ، ۇلتتىق مۇراعا دەگەن قىزىعۋشىلىعىن ارتتىرۋعا ىقپال ەتەدى.
«فەستيۆال اياسىندا قاتىسۋشىلار تەك جارىسىپ قانا قويماي، ارنايى سەمينارلارعا، شەبەرلىك ساباقتارىنا قاتىسىپ، مادەنيەت جانە ونەر سالاسىنىڭ تانىمال تۇلعالارىمەن كەزدەسەدى»، – دەدى ج. جاقسىباي.
سونىمەن قاتار جوبا بارىسىندا قىركۇيەك ايىنان باستاپ حالىقارالىق ستۋدەنتتەر كۇنىنە وراي جوو ستۋدەنتتەرىنە ارنالعان «ەڭ ۇزدىك ستۋدەنتتىك توپ» بايقاۋى ۇيىمداستىرىلادى. بايقاۋ قالاداعى بارلىق جوعارى وقۋ ورىندارىن قامتىپ، ەڭ بەلسەندى جانە ۇيىمشىل ستۋدەنتتىك قاۋىمداستىقتاردى انىقتاۋعا مۇمكىندىك بەرەدى.
«بۇل – ءوزىڭدى كورسەتۋگە، تانىلۋعا جانە ونەر سالاسىندا كاسىبي دامۋعا جاسالعان بىرەگەي مۇمكىندىك. جەڭىمپازدار قۇندى سىيلىقتارعا يە بولىپ قانا قويماي، الماتىنىڭ مادەني ومىرىنە ءوز ۇلەسىن قوسا الادى»، – دەپ اتاپ ءوتتى ن. بەكقايىروۆ.
فەستيۆالدىڭ فينالى مەن ماراپاتتاۋ ءراسىمى 25 ساۋىردە وتەدى. ۇيىمداستىرۋشىلار بۇل بايقاۋعا جۇزدەگەن جاس قاتىسىپ، ونى جىلدىڭ باستى جاستار وقيعالارىنىڭ بىرىنە اينالادى دەپ كۇتۋدە. سونداي-اق، بارشا تالانتتى جاستاردى «Jas Gala-2025» فەستيۆالىنە قاتىسۋعا شاقىرادى.