ءىس-شارا الماتى قالاسىنىڭ كۇنىنە وراي وتكىزىلدى، دەپ حابارلايدى aqshamnews.kz.
لاگەردىڭ قاتىسۋشىلارى رەتىندە قالاداعى 100 جاس كوشباسشى تاڭدالىپ، ولارعا ءتورت كۇن بويى پايدالى شەبەرلىك ساباقتارى مەن تابيعات اياسىنداعى بەلسەندى ءىس-شارالار ۇيىمداستىرىلدى. مۇنىڭ ءبارى الماتى قالاسىنىڭ جاستار ساياساتى باسقارماسىنىڭ قولداۋىمەن جۇزەگە اسىرىلدى.
«لاگەردىڭ باستى ماقساتى – جاستار ورتاسىن قالىپتاستىرۋ، جاستار ساياساتىنىڭ ۇزدىك تاجىريبەلەرى مەن يننوۆاسيالىق سالالارىن بىرىكتىرۋ. JAS CAMP جوباسىنا قاتىسۋ ءۇشىن ىرىكتەۋدەن ءوتۋ قاجەت بولدى، ونىڭ نەگىزگى كريتەرييلەرىنىڭ ءبىرى – بەلسەندى ازاماتتىق ۇستانىم، باستاماشىلدىق جانە قالانىڭ قوعامدىق ومىرىنە قاتىسۋ. قازىلار القاسىندا قوعام قايراتكەرلەرى بولدى. بارلىعى 200 ءوتىنىم بەرىلىپ، سولاردىڭ ىشىنەن 100 جاس كوشباسشى ىرىكتەلىپ الىندى»، – دەپ مالىمدەدى الماتى قالاسى جاستار ساياساتى باسقارماسى باسشىسىنىڭ مىندەتىن اتقارۋشى نۇرسۇلتان بەكقايروۆ.
لاگەر جوعارى تاۋلى «اق بۇلاق» كۋرورت-وتەلىنىڭ اۋماعىندا ورنالاسقان. قاتىسۋشىلار كوتتەدج ۇيلەرگە ورنالاستىرىلىپ، تاعامدارى ۇيىمداستىرۋشىلار ەسەبىنەن قامتاماسىز ەتىلدى. لاگەر اياقتالعان سوڭ جاستارعا ارنايى سەرتيفيكات بەرىلەدى.
JAS CAMP 2024 جاستار لاگەرىنىڭ سالتاناتتى اشىلۋى جاڭا بۋىن وكىلدەرىنەن ۇلكەن قولداۋ تاپتى. قۇرامىندا اتاقتى قوناقتار، قىزىقتى ادامدار مەن كونسەرتتىك باعدارلاماسى بار كەش كەرەمەت اسەر قالدىرارى انىق. تازا تاۋ اۋاسى، تابيعاتتىڭ سۇلۋلىعى جانە ىرعاقتى مۋزىكا كەشتى ەرەكشە ەتەدى.
ءىس-شاراعا شاقىرىلعان قوناقتاردىڭ قاتارىندا بلوگەر اسحات نۇرماشيەۆ، 2024 جىلعى وليمپيادانىڭ قولا جۇلدەگەرى الەكساندرا لە جانە باسقالار بولدى.
– بۇل جىل سايىن وتكىزىلەتىن ماڭىزدى ءىس-شارا. ءوز قىزمەتىمنىڭ اياسىندا مەن ەلىمىزگە پايدا اكەلۋگە تىرىسامىن. جاستاردىڭ قالاي دامىپ جاتقانىن كورگەنىمدە، بۇل مەنى قاتتى قۋانتادى. وسىنداي JAS CAMP سىندى جوبالار وتە قاجەت دەپ سانايمىن، سەبەبى جاستار – ءبىزدىڭ ەلىمىزدىڭ بولاشاعى، ولاردىڭ داعدىلارىن دامىتۋ مەن الەۋەتىن اشۋعا كوبىرەك كوڭىل ءبولۋ كەرەك، – دەدى اسحات نۇرماشيەۆ.
مەدەت تۇرعانجانوۆ – الماتى قالاسىنىڭ «اسسامبلەيا جاستارى» وكىلى.
– مۇندا بارلىعى كەرەمەت! ماعان جوبا مەنەدجمەنتى بويىنشا شەبەرلىك ساباعى وتە ۇنادى، سونداي-اق كاسىپكەرلەر مەن مەديا تۇلعالارمەن كەزدەسۋلەر بولدى، ولار كوپتەگەن جاڭا ءارى پايدالى اقپاراتتارمەن ءبولىستى. بۇل جوباعا قاتىسۋ مەنى قاتتى شابىتتاندىردى. ءبىلىمىمىزدى كەڭەيتىپ، داعدىلارىمدى جەتىلدىرىپ جاتقانىما وتە قۋانىشتىمىن. مۇنداي لاگەرلەر جاستارعا جاڭا ادامدارمەن تانىسۋعا، قارىم-قاتىناس ورناتۋعا، ءارتۇرلى ادامدارمەن جۇمىس ىستەۋگە مۇمكىندىك بەرەدى دەپ ويلايمىن. سونداي-اق لاگەر ورنالاسقان جەردىڭ تابيعاتى وتە ادەمى، بۇل جەردە ءبىز وقىپ، قالانىڭ قاربالاسىنان دەمالىپ، جاڭا نارسەلەردى ۇيرەنىپ جاتىرمىز. لاگەر ۇيىمداستىرۋشىلارىنا ۇلكەن العىس ايتامىن، – دەپ ءوز پىكىرىن ءبولىستى مەدەت تۇرعانجانوۆ.
