جارىس وتەتىن كۇنى قالانىڭ اۆتوجولدارى جابىلادى.
2021 جىلدىڭ 20 ماۋسىمىندا سپورتسۇيەر قاۋىم ءۇشىن الماتىدا ۇلكەن جۇگىرۋ جارىسى — الماتى جارتىلاي مارافونى وتەدى، دەپ حابارلايدى Almaty-akshamy.kz.
قاتىسۋشىلار قالانىڭ باستى كوشەلەرىمەن جۇگىرىپ وتەدى. مارافون ءال-فارابي داڭعىلىنداع تۇڭعىش پرەزيدەنت ساياباعىنىڭ جانىندا باستالىپ، اباي داڭعىلىنداعى ورتالىق ستاديوندا مارەگە جەتەدى.
قاتىسۋشىلار مىنا قاشىقتىقتاردىڭ بىرىنە جۇگىرە الادى:
- جارتىلاي مارافون 21،1 كم،
- جۇگىرۋ 10 كم،
- سكانديناۆيالىق ءجۇرىس 10 كم،
- ەكيدەن كوماندالىق ەستافەتاسى — 21،1 كم جالپى قاشىقتىق 4 قاتىسۋشى اراسىندا بولىنەدى.
«ءبىز ءىس-شارانى وتكىزۋگە رەسمي رۇقسات الدىق. مەنىڭ ويىمشا، بۇل تەك ءبىزدىڭ قور ءۇشىن عانا ەمەس، ەلىمىزدىڭ جۇگىرۋشىلەر قوعامداستىعى ءۇشىن ۇلكەن جەڭىس. ءبىز قالادا جۇگىرىستەردى ۇزاق ۋاقىت بويى وتكىزە المادىق. وتكەن جىلى الماتى جارتىلاي مارافونى ونلاين رەجيمىندە ءوتتى، ونىڭ ۇستىنە جاقىندا «الماتى مارافونىن» كۇزگە اۋىستىرۋعا تۋرا كەلدى، سەبەبى وعان 17 مىڭ ادام قاتىسۋى كەرەك ەدى. الايدا، جارتىلاي مارافون ۇلكەن بۇقارالىق وقيعا بولماعاندىقتان، ءقازىر وتكىزەمىز دەپ شەشتىك. سونىمەن قاتار كارانتين كەزىندە ستارتتاردى وتكىزۋ بويىنشا تاجىريبەمىز بار جانە ۇيىمداستىرۋ كەزىندە قانداي نارسەلەرگە نازار اۋدارۋ كەرەكتىگىن، سپورتشىلاردىڭ قاۋىپسىزدىگىن قالاي قامتاماسىز ەتۋدى بىلەمىز"، — دەيدى «ءبىرىنشى بولۋ - باتىلدىق» كورپوراتيۆتىك قورىنىڭ ديرەكتورى سالتانات قازىبايەۆا.