الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا «جاناشىر» حالىقارالىق قوعامدىق قورىنىڭ پرەزيدەنتى جاڭىل اپەتوۆا 2024 جىلى ۇيىم جۇمىسىنىڭ ناتيجەلەرىن جانە مەملەكەتتىك الەۋمەتتىك تاپسىرىستاردى ىسكە اسىرۋ قورىتىندىلارىن ۇسىندى، دەپ حابارلايدى aqshamnews.kz
1997 جىلى قۇرىلعان ۇيىم 30 جىلعا جۋىق ۋاقىت بويى ۇلتتىق قۇندىلىقتاردى ساقتاۋعا، ازاماتتىق قوعامدى قولداۋعا جانە جاستاردى پاتريوتتىق تاربيەلەۋگە باعىتتالعان جوبالاردى بەلسەندى تۇردە جۇزەگە اسىرىپ كەلەدى. وسى جىلدار ىشىندە قور 5000-نان استام ءىس-شارا وتكىزدى، ولاردىڭ كوپشىلىگى قالا مەن ەل ءۇشىن ماڭىزدى بولدى.
2024 جىلى «جاناشىر» قورى ءۇش مەملەكەتتىك الەۋمەتتىك تاپسىرىستى ءساتتى جۇزەگە اسىردى، ونىڭ ىشىندە — زاڭگەرلىك كونسۋلتاسيالار، جۇزدەگەن اقپاراتتىق ماتەريالداردى جاريالاۋ جانە ساۋدا ورتالىقتارىنداعى ءموبيلدى توپتاردىڭ جۇمىسىن قامتيتىن تۇتىنۋشىلاردىڭ قۇقىقتارىن قورعاۋ جوباسى بار.
«ءبىز 5000-عا جۋىق كەڭەس وتكىزدىك، 12 وقۋ ورنىندا كەزدەسۋلەر ۇيىمداستىردىق، بەينەروليكتەر جاسادىق جانە الەۋمەتتىك جەلىلەردە بەلسەندى جۇمىس ىستەدىك. بۇل ازاماتتاردىڭ ءوز قۇقىقتارى تۋرالى حاباردارلىعىن ارتتىرۋ ءۇشىن ۇلكەن قادام بولدى»، — دەپ اتاپ ءوتتى جاڭىل اپەتوۆا.
جىلدىڭ جارقىن وقيعالارىنىڭ ءبىرى 235 وتباسى قاتىسقان «مەرەيلى وتباسى» بايقاۋى بولدى. سالتاناتتى ماراپاتتاۋ ءراسىمى شىلدە ايىندا ءوتتى، ال بايقاۋ قورىتىندىسى باق-تا كەڭىنەن جاريالاندى. قور باسشىسى مۇنداي جوبالار وتباسىلىق قۇندىلىقتاردى ناسيحاتتاۋ ءۇشىن ەرەكشە ماڭىزدى ەكەنىن اتاپ ءوتتى.
«پاتريوتتىق رۋح – باستى قۇندىلىق» جوباسى جاستار اراسىندا پاتريوتيزمگە تاربيەلەۋگە جانە جەلتوقسان وقيعاسىنىڭ باتىرى ەربول سىپاتايەۆتى ەسكە الۋعا ارنالدى. جوبا اياسىندا سەنبىلىكتەر، ەسسە بايقاۋى، جەلتوقسان وقيعاسىنا قاتىسۋشىلارمەن كەزدەسۋلەر جانە ونىڭ تۋعانىنا 60 جىل تولۋىنا وراي «قازاق كۇرەسى» بويىنشا تۋرنير ۇيىمداستىرىلدى.
«ءبىز جاستارعا 1986 جىلعى جەلتوقسانداعى وقيعالاردىڭ سيمۆولى بولعان تاۋەلسىزدىك پەن پاتريوتيزم رۋحىن جەتكىزۋگە تىرىسامىز»، - دەپ تولىقتىردى وكق سپيكەرى.
قوردىڭ بارلىق جوبالارى الماتى ازاماتتىق ورتالىعىنىڭ ساراپشىلارى تاراپىنان قاتاڭ باقىلاۋدان وتەدى. ورىندالعان جۇمىس تۋرالى ەسەپتەر مۇقيات تەكسەرىلىپ، سودان كەيىن عانا تاپسىرىس بەرۋشىلەر قابىلدايدى. جاڭىل امانتاي قىزىنىڭ ايتۋىنشا، 2024 جىلدىڭ ناتيجەلەرى ۇيىم جۇمىسىنىڭ جوعارى تيىمدىلىگىن راستايدى.
«ءبىز ءارقاشان قوعامنىڭ كۇتكەن ءۇمىتىن قاناعاتتاندىرۋعا، ونىڭ دامۋىن قولداۋعا جانە مەملەكەت پەن ازاماتتار اراسىنداعى كوپىر بولۋعا تىرىسامىز»، — دەپ قورىتىندىلادى ج.اپەتوۆا.