الماتى قالاسى بويىنشا ۇقكد جانە قالالىق پد ۇيىمداسقان قىلمىسقا قارسى كۇرەس باسقارماسى قىزمەتكەرلەرى جاڭا تۋعان سابيلەردى ساتۋمەن اينالىسقان قىلمىستىق توپتىڭ ارەكەتىن اشكەرەلەدى، – دەپ حابارلايدى aqshamnews.kz Polisia.kz-كە سىلتەمە جاساپ.
بار دەرەكتەرگە سايكەس، بۇل قىلمىستىق تىزبەك سوڭعى بىرنەشە جىل بويى الەۋمەتتىك جەلىلەر ارقىلى ۇيىمداستىرىلىپ كەلگەن.
قاسكويلەردىڭ نەگىزگى ماقساتى – الەۋمەتتىك جاعىنان وسال توپتاعى ايەلدەردەن، سونىڭ ىشىندە شەتەل ازاماتتارىنان تۋعان سابيلەردى ساتىپ الۋعا نيەتتى ادامدارعا زاڭسىز جولمەن بەرۋدى ۇيىمداستىرۋ بولعان. جەدەل ءىس-شارالار بارىسىندا جاڭا تۋعان ۇل بالانى قوماقتى اقشاعا ساتۋ ارەكەتى قۇجاتتالعان. اقشا بەرۋ كەزىندە كۇدىكتىلەر قىلمىس ۇستىندە ۇستالدى. ءسابي مەملەكەت قامقورلىعىنا بەرىلىپ، ءتيىستى مەكەمەگە ورنالاستىرىلدى. اتالعان دەرەك بويىنشا قىلمىستىق ءىس قوزعالدى. كۇدىكتىلەر قاماۋعا الىندى. تەرگەۋ امالدارى جۇرگىزىلۋدە، سونداي-اق ەلدىڭ باسقا وڭىرلەرىندە وسىعان ۇقساس ەپيزودتاردىڭ بولۋى مۇمكىندىگى تەكسەرىلۋدە.
"بۇل – ءبىر رەتتىك ارەكەت ەمەس. مۇندا تۇراقتى، ءتىپتى ءوڭىرارالىق بايلانىستارى بار تىزبەكتىڭ بار بولۋى مۇمكىن ەكەنىن جوققا شىعارمايمىز. بارلىق قاتىسى بار ادامدى انىقتاۋ جۇمىستارى جالعاسۋدا. بالالارعا، اسىرەسە جاڭا تۋعان سابيلەرگە قاتىستى زاڭسىز ارەكەتتەر – بۇل ەرەكشە قاتىگەز جانە اۋىر قىلمىس. مۇنداي ءاربىر دەرەك زاڭ اياسىندا ءادىل باعاسىن الادى"، – دەدى الماتى قالالىق پوليسيا دەپارتامەنتى باستىعىنىڭ ءبىرىنشى ورىنباسارى كۋاتبەك ناۋاتوۆ.