الماتىدا جاڭا ماماندىقتار مەن قۇزىرەتتەردى تەحنيكالىق جانە كاسىپتىك ءبىلىم بەرۋ جۇيەسىنە ەنگىزۋ ماسەلەسى قارالعان فورسايت-سەسسيا ءوتتى. ءىس-شاراعا «اتامەكەن» ۇكپ، «ماماندىعىم – بولاشاعىم» جوبالىق ءوفيسى، سالالىق قاۋىمداستىقتار، ۇەۇ، سونداي-اق كوللەدج باسشىلارى مەن وقىتۋشىلار قاتىستى.
جيىندا كرەاتيۆتى يندۋستريالار، اقپارات جانە بايلانىس، سەرۆيس پەن ءقوناقۇي بيزنەسى، قۇرىلىس پەن ۋربانيستيكا، كولىك پەن لوگيستيكا جانە ءبىلىم بەرۋ سىندى التى نەگىزگى سالاعا نازار اۋدارىلدى.
الماتى قۇرىلىس جانە مەنەدجمەنت كوللەدجى ديرەكتورىنىڭ ورىنباسارى جۇحارگۇل ابليزوۆانىڭ ايتۋىنشا، قۇرىلىس سالاسى قارقىندى وزگەرىستەرگە ۇشىراپ وتىر.
– جاڭا ماماندىقتار اتلاسىنا وسى باعىت بويىنشا 11 پوزيسيا ەنگىزىلدى. ولاردىڭ قاتارىندا سيتي-مەنەدجەر، 3D-عيماراتتار جوبالاۋشىسى، ءوندىرىستى روبوتتاندىرۋ مامانى بار. بۇل ەڭبەك نارىعىنىڭ ناقتى سۇرانىسىنا ساي كەلەدى، – دەيدى جۇحارگۇل ابليزوۆا.
ءقوناقۇي جانە تۋريزم يندۋسترياسى كوللەدجى كاسىبي وقىتۋ جونىندەگى ديرەكتورىنىڭ ورىنباسارى ليليا راحيمگەرەەۆا دا ءوز سالاسىنداعى وزگەرىستەردى اتاپ ءوتتى:
– ءقوناقۇي يندۋسترياسىندا كوپتەگەن ءداستۇرلى ماماندىقتار جويىلىپ، جاڭا باعىتتار پايدا بولۋدا. ەكولوگيا، اۆتوماتتاندىرۋ، سيفرلىق قىزمەتتەر – باستى ترەندتەر. تەك ءبىزدىڭ سالا بويىنشا اتلاسقا 21 ماماندىق ەنگىزىلدى. بيىل العاش رەت «دەستيناسيانى باسقارۋ» اتتى جاڭا ماماندىق اشىلىپ، ىشكى ءتۋريزمدى دامىتۋعا باعىتتالدى، – دەدى ول.
الماتى قالاسى ءبىلىم باسقارماسىنا قاراستى عىلىمي-ادىستەمەلىك ورتالىقتىڭ تەحنيكالىق جانە كاسىپتىك ءبىلىم بەرۋ ءبولىمىنىڭ باسشىسى گۇلنار سۇلەيمەنوۆا قورىتىندىسىندا جاڭا بۋىننىڭ ەڭبەك نارىعىنا دايىن بولۋىنا كوللەدجدەر مەن جۇمىس بەرۋشىلەردىڭ بىرلەسكەن ەڭبەگى قاجەت ەكەنىن باسا بەلگىلەپ ءوتتى. ول فورۋمدا 114 پەرسپەكتيۆالى ماماندىعى زەردەلەنىپ، سونىڭ ىشىندە 69 پوزيسيانى ەنگىزۋ جوسپارلانعانىنا توقتالدى:
– بۇلار 4 ماماندىق، 29 قۇزىرەت، 26 مودۋل جانە 11 وقۋ ناتيجەسى. بۇل قاتاردا ۆيرتۋالدى ساياحات ديزاينەرى، قۇرىلىس سالاسىنداعى روبوتتاندىرۋ ماماندارى بار. جاڭا بۋىننىڭ ەڭبەك نارىعىنا دايىن بولۋىنا كوللەدجدەر مەن جۇمىس بەرۋشىلەردىڭ بىرلەسكەن ەڭبەگى قاجەت، – دەدى ول.
فورسايت-سەسسيا قورىتىندىسىندا ءبىلىم بەرۋ باعدارلامالارى مەن ستاندارتتارىن جاڭعىرتۋ جالعاساتىنى بەلگىلى بولدى. ماقسات – الماتىداعى ءبىلىم بەرۋ جۇيەسىن سيفرلىق ەكونوميكانىڭ تالاپتارىنا بەيىمدەپ، جۇمىس بەرۋشىلەردىڭ سۇرانىسىنا ساي كادرلار دايارلاۋ.